Kryetarja e Komunës së Preshevës, Ardita Sinani ka reaguar pas sulmit të mbrëmshëm në tubacionin e ujitjes Ibër-Lepenc në fshatin Varagë të Zubin Potokut. Ajo ka dënuar këtë akt dhe ka vlerësuar si sulm terrorist.
Sinani, përmes rrjetit social ‘Facebook’, ka shkruar se ky veprim kriminal e terrorist kërkon hetim të plotë dhe përgjegjësi maksimale për autorët.
“Kosova mbetet e vendosur për të ruajtur paqen dhe rendin, duke mos lejuar asnjë akt që minon sigurinë. Në këto momente të rënda jemi me zemër me Republikën e Kosovës, institucionet dhe popullin e saj!”, ka shkruar Sinani.
Postimi i plotë
Dënoj ashpër sulmin terrorist në Zubin Potok të Republikës së Kosovës
Sulmi i mbrëmshëm në fshatin Varagë të Zubin Potokut, që ka dëmtuar infrastrukturën kritike me qëllim cenimin e sigurisë kombëtare është një akt i rëndë dhe i papranueshëm që cenon sigurinë dhe stabilitetin e vendit. Ky sulm nuk mund të jetë ndryshe pos sulm terrorist.
Ky veprim kriminal e terrorist kërkon hetim të plotë dhe përgjegjësi maksimale për autorët. Kosova mbetet e vendosur për të ruajtur paqen dhe rendin, duke mos lejuar asnjë akt që minon sigurinë.
Në këto momente të rënda jemi me zemër me Republikën e Kosovës, institucionet dhe popullin e saj!
