Kryetari i Komunës së Podujevës, Shpejtim Bulliqi, ka vlerësuar se qeveria e Kosovës ka shpërndarë në mënyrë të barabartë buxhetin për të gjitha komunat e Kosovës për vitin 2025.
Sa i përket deklarimeve të Asociacionit të Komunave të Kosovës se buxheti i vitit 2025 nuk i përmbush kërkesat e komunave, Bulliqi ka thënë se ka buxhet të mjaftueshëm për të gjitha komunat që është ndarë nga qeveria.
Lidhur me shpërndarjen e investimeve, Bulliqi inkurajoi komunat të hartojnë dhe paraqesin projekte konkrete dhe me kohë. Ai përmendi shembullin e Ministrisë së Arsimit, e cila, sipas tij, ka ofruar mjete të konsiderueshme për ndërtimin e çerdheve të reja, por theksoi se kërkesat dhe përcaktimi i lokacioneve janë përgjegjësi e komunave.
“Ajo që është shumë e rëndësishme kemi një shpërndarje gjithandej nëpër të gjitha komunat, investime të ndryshme të resorëve ministrore. Ka komuna të cilat faktikisht përkundër mundësive që të kërkojnë, të bëjnë krekës, të shtrojnë projekte, të paraqesin projekte, kemi raste që nuk po paraqesin. Ju e keni rastin e Ministrisë së Arsimit, Ministria e Arsimit ka ofruar një shumë të madhe të mjeteve për ndërtimin e çerdheve të reja. Mirëpo MASHTI-i nuk është ajo që përcakton lokacionet nëpër komunat të caktuara dhe shtron kërkesën në emër të komunave. Unë besoj që çdo komunë që harton projekte të mira, i paraqet ato projekte me kohë, kërkon mjete financiare unë besoj që ka për të gjitha komunat mjaftueshëm buxhet, fundja është buxhet i qytetarëve të Kosovës”, ka thënë ai.
Kryetari Bulliqi ka thënë se komuna që udhëheq ai ka miratuar buxhetin komunal në vlerën e 33 milion eurove, prej tyre mbi 9 milionë euro janë ndarë për investime kapitale, ndërsa pjesa tjetër do të përdoret për shërbime dhe mallra.
Ai shtoi se janë bërë kërkesa shtesë edhe në nivelin qendror, duke theksuar se për vitin 2024 komuna ka përfituar mbi 14 milionë euro nëpërmjet memorandumeve të ndryshme me ministritë.
“Diku në muajin shtator komuna e Podujevës ka bërë miratimin e buxhetit për vitin 2025 me një votim unanim. Kemi një buxhet mbi 33 milion euro për vitin 2025 që është komunal, prej tyre mbi 9 milion euro janë investime kapitale, pjesa tjetër është shërbime dhe mallra. Unë besoj që me këtë buxhet komuna e Podujevës planifikon që të realizoj një varg projektesh për vitin e ardhshëm. Mirëpo, ajo që është shumë e rëndësishme ne kemi parashtruar edhe një varg kërkesash në nivelin qendror, nëpër ministrit përkatëse dhe besoj që edhe nga niveli qendror kemi një pjesë të buxhetit që është planifikuar për komunën e Podujevës dhe besoj që bashkërisht do të arrijmë që të realizojmë një vragë punësh të mira për qytetar tanë. Ajo që është shumë e rëndësishme është fakti që komuna e Podujevës mburret me krejt ato ndihma në kuptim të mjeteve financiare që kanë ndarë ministrit përkatëse për investime kapitale. Mund të themi që vetëm viti 2024 të cilin po e lëmë pas kemi mbi 14 milion euro me memorandume të ndryshme më ministrit e ndryshme që i kemi realizuar”, ka thënë ai për Eo.
