“Nuk sakrifikojmë ne për KEDS-in”, Qytetarët protestojnë kundër shtrenjtimit të energjisë, një protestues arrestohet

Hedhja e ngjyrës së kuqe në drejtim të objektit të KEDS-it ka shënuar momentin e eskalimit të protestës kundër rritjes së çmimit të energjisë elektrike në Prishtinë, duke çuar në ndërhyrjen e Policisë së Kosovës dhe arrestimin e një personi.

Protestuesit kanë brohoritur kundër rritjes së paralajmëruar të faturave të rrymës. Ndërkohë, pas tensioneve tek ndërtesa e KEDS-it, është arrestuar një i moshuar.

Organizatorët e quajnë këtë proces të padrejtë dhe dëmshëm për qytetarët.

Aktivisti Erbilin Ajdini ka akuzuar KEDS-in për rritje të vazhdueshme dhe të padrejtë të faturave të energjisë elektrike. Ai ka deklaruar se në vitin 2022 dhe 2023 qytetarëve u janë rritur faturat me arsyetimin e krizës globale, ndërsa sivjet, sipas tij, po tentohet një rritje tjetër prej rreth 20 për qind.

Ajdini: Na thonë se problemi është te konsumi ynë i tepërt dhe jo te apetiti i KEDS-it

“Në vitin 2022 KEDS kërkon që të shtrenjtohen faturat e rrymës, këta e arsyetojnë se ka shtrenjtim anë e mbanë botës, dhe ne i besuam. Vitin tjetër KEDS bëri të njëjtën kërkesë, dhe ndonëse skeptik, i lejuam që të vjedhin pak më shumë se vitin e kaluar. Sot KEDS thjesht zgjat dorën drejt në xhepat tonë dhe merr aq sa ia do qejfi. E kemi pa tashmë që kjo dëshirë nuk ngopet askund, se apetiti i KEDS është i gatshëm që të na ngulfatë që të trashë profitin e tyre. Po nuk iu bindëm, ata na kërcënojnë me kamxhik të territ. Na thonë se pa KEDS nuk do të kishim dritë në lagjet tona, na thonë se pa KEDS nuk do të kemi ngrohje në lagjet tona. Na thonë se problemi është te konsumi ynë i tepërt dhe jo te apetiti i KEDS-it. Vjet vodhën prej 16.1 për qind, që na bënë trekëndëshi KEDS–ZRRE–Qeveri. Edhe sivjet po duan me na trashë edhe më shumë e me na thënë se ka rritje tjetër prej 20 për qind, është një hile e zanatit të KEDS”, ka thënë ai.

Ai ka paralajmëruar bojkot të faturave të energjisë elektrike, si dhe bllokim të rrugëve dhe institucioneve në rast të shtrenjtimit të çmimit të rrymës.

Ajdini: Në momentin kur ju shtrenjtoni faturat ne fillojmë bojkotin

“Këtu prapa nesh po na zihet edhe një hile tjetër, që neve popullin do të na varfërojnë edhe më shumë. Por këtë hile nuk mundemi me e kapërcye këtu. Jemi këtu për me i thënë KEDS se durimit tonë i ka ardhur fundi dhe nuk mund të silleni sikur kapadai e që na shtroni zullumin kudo që ua vë syrin edhe një zero më shumë në obligimet e juaja. Ju nuk mund të vazhdoni të vidhni këtë popull të cilëve veçse ia keni vjedhur një pjesë të aseteve më jetike. Nuk mund të vazhdoni të na i faturoni neve dështimet dhe dëshirat e juaja për rritje, mbi trupat tonë. Tash e sa vjet nuk jeni në shërbimin tonë, jeni kundër nesh, jeni fajdexhinjtë tanë më të mëdhenj. Andaj tash e tutje edhe ne do t’iu dalim përballë, do t’iu përcjellim dhe do t’ju bojkotojmë deri kur ky institucion të kthehet në anën e popullit. Në momentin kur ju shtrenjtoni faturat, ne fillojmë bojkotin. Do t’i bojkotojmë faturat dhe do të bllokojmë rrugë e institucione deri atëherë kur ky vend të fillojë punën për ne dhe jo për kapitalin”, theksoi ai.

Qytetarja Sevdije Sadiku në mes të turmës, ka shprehur shqetësimin e saj për barrën e rëndë që po mbajnë familjet kosovare.

Sadiku: Një pjesë e madhe kemi me mbet borxh te KEK-u dhe kemi me mbet në terr

“Populli ka me mbet në terr. Një pjesë e madhe kemi me mbet borxh te KEK-u dhe kemi me mbet në terr, ja kjo është qeveria jonë, këta vet i kanë rregullu punët, vozitën me xhipa të zi, kanë pare, kanë luks, hajna ushqime të mira. Ne si do të jetojmë, çka do të hamë e çka do të pimë. Ne veç rrymën duhet me pagu dhe ujin, me ja plotësu shtetit pagesat. E na çka duhet me ngrënë? Sa barnat e shtrenjta, sa sëmundjet i ka çu Zoti, si do të jetojna na. Çka po mendojnë. Çdo ditë njerëzit po ikin për një jetë më të mirë. Jemi në një vend shumë të pasur, kemi diell, ujëra, erë, dhe nuk do të thotë vetëm me thëngjill me u furnizu me rrymë, ka energji të ripërtritshme, dhe rryma mundet me qenë shumë më lirë”, tha ajo.

Edhe një qytetar tjetër në moshë, është shprehur i revoltuar nga kjo situatë.

“Qeveri kriminale i ka lënduar me qindra policë, që sot këta fëmijët tanë të mjerë e kapin prindërit e tyre pse kundërshton shtrenjtimin e rrymës. Unë plak 70-vjeçar kam me i pri këtij populli për ta përmbys këtë qeveri, qeveri kriminale. Ai kryeministër që ik prej popullit nuk është kryeministër i popullit të Kosovës”, tha ai.

Protestuesit vazhduan protestën nëpër sheshet e Prishtinës për t’u ndalur tek Qeveria. Aty policia kishte vendosur një kordon por me insistim, protestuesit arritën të kalojnë deri tek dera hyrëse e objektit të qeverisë, ku edhe vendosen “STOP hajnisë me fatura të rrymës”, “KEDS-i na len n’terr e na vjedhë” dhe “Rryma rritet, populli djeget”.

Organizator i protestës, Egzon Hajdari ka akuzuar Zyrën e Rregullatorit për Energji (ZRRE) se ka aprovuar kërkesat e KEDS-it pa marrë parasysh interesat e qytetarëve. Ai para ndërtesës se qeverisë ka bërë thirrje për mobilizim më të madh të qytetarëve në protestat e ardhshme dhe ka kërkuar ndërhyrje të menjëhershme.

Hajdari: Të vetmin rol që e ka luajtur ZRRE deri tash është aprovimi i kërkesave të KEDS

“Të vetmin rol që e ka luajtur ZRRE deri tash është aprovimi i kërkesave të KEDS. Kërkoj nga gjithë qytetarët që të na bashkohen në protestat e radhës edhe më shumë. Kërkesa e parë e menjëhershme duhet të jetë parandalimi i rritjes abuzive nga KEDS-i, sepse qytetarët nuk ja kanë borxh fitimin KEDS-it. Kërkesa e dytë menjëherë pas konsituimit të kuvendit dhe qeverisë duhet të shkarkohet bordi i ZRRE-së i cili p i shërben KEDS, e jo qytetarëve. Dhe duhet të hapet debati dhe të fillojë procesi i shtetëzimit të KEDS-it. KEDS-i duhet t’i takojë popullit”, ka thënë ai.

Në mes të protestës, edhe qytetarja, Sevdije Sadiku ka shprehur revoltën e saj për barrën e rëndë që po mbajnë familjet kosovare.

Sadiku: KEK punon, KEDS fiton, ZRRE as vet se dimë çka bën

“Këta vet i kanë rregulluar punët, po shëtitën, resorte, pushime u kënaqen, lakimi po ju marr, qysh nuk më kanë thirr edhe mu në qeveri me punu. Sot kisha punuar dhe isha dalë duke ju përgjigjur qytetarëve për rrymën e shtrenjtë, kush e udhëheq ZRRE, kujt i përgjigjet ZRRE, ”, është shprehur ajo.

Protesta e organizuar nga “Kolektivi për Mendim dhe Veprim Feminist” në bashkëpunim me “Përpjekja”, është shpërndarë e qetë para qeverisë.

Ndryshe, KESCO ka propozuar rritje prej 21.4 për qind të çmimit të energjisë elektrike, duke theksuar se vendimi final do të merret nga ZRRE pas shqyrtimit

Një person është arrestuar gjatë protestës kundër shtrenjtimit të rrymës elektrike.

Ai u arrestua pasi u gjuajt ngjyrë e kuqe në drejtim të objektit të KEDS, ani pse ai thoshte se nuk e gjuajti atë.

Para objektit të KEDS-it në Prishtinë po mbahet një protestë në të cilën qytetarë dhe përfaqësues të shoqërisë civile po kundërshtojnë njëzëri mundësinë e rritjes së çmimit të energjisë elektrike.

Në këtë protestë po merr pjesë edhe avokati i njohur Arianit Koci, i cili ka sqaruar se është tërhequr nga organizimi i protestës për shkak të një konflikti të mundshëm interesi, por ka zgjedhur të jetë prezent si qytetar.

“Jam tërhequr nga organizimi i protestës për shkak të konfliktit të mundshëm të interesit. Megjithatë, siç po shihet, sot ka më shumë gazetarë dhe individë që po presin autobusë në anën tjetër të rrugës sesa protestues këtu. Kjo është katastrofë për të gjithë ne”, deklaroi Koci.

Ai kritikoi mungesën e pjesëmarrjes qytetare.

Koci paralajmëroi se në protestat e ardhshme do të jetë në ballë të organizimit dhe theksoi se ka edhe shumë çështje të tjera për të cilat qytetarët duhet të protestojnë.

Qytetarët kanë filluar të mblidhen para objektit të KEDS-it në Prishtinë, për të kundërshtuar njëzëri mundësinë edhe të një tjetër rritje të çmimit të energjisë.

Në pankarta shihet mbishkrimi ku i janë përgjigjur ministres në detyrë të ekonomisë, Artane Rizvanolli, se gjoja po sakrifikojnë, për një energji të sigurt në të ardhmen. “Nuk sakrifikojmë ne për KEDS”-in, thuhet në një nga pankaratat.

“Nuk sakrifikojmë ne për KEDS”-in, “Rryma nuk është luks”. “ZRRE-ja argat i KEDS-it”, “Rryma rritet, populli digjet”, janë të tjera pankarta që qytetarët protestues po mbajnë në duar.

Kolektivi për Mendim dhe Veprim Feminist dhe organizata “Përpjekja”, kërkesën e KESCO-s që të bëhet edhe një rritje e çmimit të energjisë prej 21.3 për qind, e kanë cilësuar proces të padrejtë dhe të dëmshëm për qytetarët e Kosovës.

Filluan te KEDS-i, por protestuesit do të marshojnë drejt objektit të qeverisë, për t’i shpalosur po të njëjta kërkesa, pra atë për kundërshtimin e rritjes së çmimit të energjisë elektrike.

Dy organizata të shoqërisë civile, Kolektivi për Mendim dhe Veprim Feminist dhe organizata “Përpjekja”, kanë paralajmëruar për sot protestë kundër rritjes së mundshme të çmimit të energjisë elektrike, duke e cilësuar këtë proces si të padrejtë dhe të dëmshëm për qytetarët e Kosovës.

Protesta do të mbahet duke filluar në ora 13:00, me grumbullim pranë ndërtesës së KEDS, ndërsa marshimi do të përfundojë para ndërtesës së Qeverisë së Republikës së Kosovës.

Në reagimin e tyre publik, organizatat theksojnë se që nga viti 2022 qytetarët janë përballur me rritje të vazhdueshme të faturave të rrymës, të cilat, sipas tyre, janë aprovuar nga Zyra e Rregullatorit për Energji (ZRrE) në favor të kompanisë KEDS dhe në dëm të interesit publik.

Sipas deklaratës, konsumatorët nuk po paguajnë vetëm çmimin e energjisë, por edhe humbjet dhe keqmenaxhimin e kompanisë private. Organizatat kritikojnë edhe ndërprerjet e shpeshta të energjisë, mungesën e ngrohjes gjatë muajve të dimrit dhe ndikimin e drejtpërdrejtë që shtrenjtimi i rrymës ka në rritjen e kostos së jetesës.

Ato rikujtojnë se vitin e kaluar është miratuar një rritje prej 16.1%, ndërsa këtë vit po paralajmërohet një tjetër rritje rreth 20%, të cilën e konsiderojnë të papranueshme. Sipas tyre, KEDS përfiton duke blerë energji me çmime të ulëta nga Korporata Energjetike e Kosovës dhe duke ua shitur qytetarëve me çmime shumë më të larta.

Organizatat u kanë bërë thirrje qytetarëve që t’i bashkohen protestës, duke theksuar se mobilizimi qytetar është thelbësor për mbrojtjen e interesit publik dhe përballjen me, siç e quajnë ata, praktikat shumëvjeçare dhe të dëmshme në sektorin e energjisë.