Kurti pas incidentit me vezë: Nuk ankohem që më gjuajnë, por që nuk duan të takohen

Kryeministri në detyrë i Kosovës, Albin Kurti, ka komentuar incidentin e sotëm në Kuvend, ku ndaj tij u hodhën vezë nga një deputete e opozitës. Kurti ka thënë se, për të, veprime të tilla janë çështje dytësore në raport me nevojën për një marrëveshje politike për krijimin e institucioneve.

“Për mua, të gjitha çështjet janë të dorës së dytë ose të tretë, krahasuar me marrëveshjen që na duhet”, ka deklaruar Kurti.

Ai ka thënë se nuk është në politikë për veten e tij, por për Republikën e Kosovës, duke u bërë thirrje partive politike që të ulen dhe të dialogojnë.

“Unë nuk jam këtu për veten time. Unë jam këtu për Republikën e Kosovës dhe kërkoj që edhe të tjerët të ulemi dhe për Republikën e Kosovës të bëjmë marrëveshje”, është shprehur ai.

Kurti ka thënë se është i gatshëm të përballojë edhe veprime të tilla, nëse ato do të çonin në uljen e palëve në tryezën e dialogut.

“Nëse gjuajtja me vezë dhe goditja e sakos dhe pantallonave të kryeministrit nga vezët që i hedh një deputete është çmimi që unë duhet ta paguaj në mënyrë që ata të ulen dhe të bisedojmë e të dialogojmë, jam i lumtur ta paguaj këtë çmim, vetëm le të vijnë në takim”, ka thënë Kurti.

Në fund, ai ka theksuar se problemi kryesor, sipas tij, nuk është incidenti me vezët, por refuzimi i takimeve politike.

“Unë nuk ankohem që ata hedhin vezë, ankohem që ata s’duan të takohen”, ka deklaruar Kurti.

Kryeminsitri i Kosovës, Albin Kurti në një deklaratë për media dhënë pas seancës së Kuvendit ka thënë se nuk duhet shpallur përpjekjet e dështuara ose të përfunduara.

Sipas tij, kushtetueshmëria e Kosovës e kërkon që të vazhdojnë përpjekjet drejtë krijimit të institucioneve.

“Unë nuk besoj që duhet t’i shpallim përpjekjet e dështuara apo të përfunduara. Unë besoj që ne duhet të vazhdojmë të përpiqemi sepse kështu e kërkon kushtetutshmëria dhe kësisoj pret populli i Kosovës prej nesh”, deklaroj Kurti.

Deklarata e plotë në video:

Kryeministri në detyrë dhe kryetari i Lëvizjes Vetëvendosje, Albin Kurti, pas ndërprerjes së seancës konstituive ka thënë se LVV-ja nuk propozoi kandidat për kryetar të Kuvendit, ndonëse i ka votat, pasi sipas tij pa marrëveshje politike për zgjedhjen e presidentit vendi do të shkonte në zgjedhje të reja.

Kurti tha se kërkesa e tij është që liderët e partive parlamentare të takohen dhe të arrijnë një marrëveshje për konstituimin e Kuvendit, formimin e Qeverisë dhe zgjedhjen e presidentit apo presidentes.

“Meqenëse çfarëdo konstituimi i Kuvendit pa marrëveshje politike që do të garantonte qëndrimin në sallë dhe votimin për Presidentin e Republikës, pashmangshëm do të na shpiente tek zgjedhjet e reja, të përsëritura, të parakohshme, të paarsyeshme, të nevajshme dhe gjithsesi të dëmshme.”

Ai tha se përpjekjet për arritjen e marrëveshjes duhet të vazhdojnë dhe se gjatë orëve të fundit ka zhvilluar takim, ka dërguar letra dhe mesazhe për takime me liderët e partive politike.

“Nuk ka kuptim që të mos bëjmë marrëveshje. Nuk ka kuptim që të mos bashkëbisedojmë. Në këto orët e fundit, ndërmjet fillimit të seancës për konstituimin e Kuvendit dhe vazhdimit të kësaj seance, unë kam pasur takim, gjithashtu kam shkruar letra, kam shkruar letra që ftojnë për takim, kam shkruar letra që japin përgjigje për qëndrimet në mungesë të takimeve, kam shkruar mesazhe telefonike për t'u takuar me liderët e partive politike, dhe unë nuk besoj që duhet t'i shpallim përpjekjet e dështuara apo të përfunduara.”

Kurti tha se përgjegjësia për zgjedhjen e presidentit nuk është vetëm e LVV-së, ndërsa theksoi se presidenti duhet të jetë mbi partiak dhe një personalitet me karakter të dëshmuar.

“Presidenti duhet të jetë mbi partiak, jashtë polemikave ditore, jo në këtë skenën aktuale politike, por një personalitet me karakter të dëshmuar, me vlera e merita profesionale e kombëtare.”

Ai u bëri përsëri thirrje krerëve të PDK-së, LDK-së dhe AAK-së për takim.

“Prandaj edhe një herë u bëj thirrje kryetarit të PDK-së, Bedri Hamzës, kryetarit të LDK-së, Lumir Abdixhikut, kryetarit të Aleancës, Ardian Gjinit, që të bisedojmë duke u takuar, dhe duke u takuar të merremi vesh, të bëjmë marrëveshje politike për rrugën e përbashkët përpara, për hir të institucioneve të Republikës dhe popullit të Kosovës e të ardhmes së tij.”

Duke folur për hedhjen e vezëve ndaj tij nga deputetja e AAK-së, Time Kadrijaj, Kurti tha se është i gatshëm ta paguajë këtë çmim nëse kjo do të sillte takimin me liderët e partive.

“Nëse gjuajtja me vezë dhe goditja e sakos dhe pantallonave të kryeministrit nga vezët që i hedh një deputete është çmimi që unë duhet ta paguaj në mënyrë që ata të ulen dhe bisedojnë jam i lumtur ta paguaj këtë çmim vetëm të vijnë në takim. Unë nuk ankohem që ata hedhen vezë, ankohem që ata nuk duan të takohen”.