Një gjykatë federale e apelit në SHBA miratoi sot një ligj që kërkon që kompania kineze ByteDance të braktisë aplikacionin e saj të njohur TikTok në Shtetet e Bashkuara deri në fillim të vitit të ardhshëm ose të përballet me një ndalim.
Vendimi mund të ankimohet në Gjykatën e Lartë ose në kolegjin e plotë të Gjykatës së Apelit.
Presidenti Joe Biden, i cili nënshkroi ligjin në prill, mund të jep një zgjatje një herë deri në 90 ditë, por vetëm nëse ByteDance ka bërë përparim të rëndësishëm në gjetjen e një blerësi. Pa zgjatjen e Bidenit, vendimi i gjykatës do të kishte çuar në ndalimin e TikTok më 19 janar.
Departamenti i Drejtësisë thotë se TikTok në pronësi kineze përbën një kërcënim serioz për sigurinë kombëtare për shkak të qasjes në sasi të mëdha të informacionit personal të amerikanëve. TikTok dhe ByteDance kundërshtojnë se ligji është antikushtetues dhe shkel të drejtat e fjalës së lirë të amerikanëve.
Presidenti i sapozgjedhur Donald Trump, tha përpara zgjedhjeve të nëntorit se nuk do të lejonte që TikTok, i cili përdoret nga 170 milionë amerikanë, të ndalohej.
Ligji ndalon dyqanet e aplikacioneve Apple dhe Google që të ofrojnë TikTok dhe ndalon shërbimet e mbajtjes së internetit të mbështesin TikTok, përveç nëse ByteDance shet TikTok brenda afatit.
