Kryeministri në detyrë i Libanit Najib Mikati deklaroi sot se rreth një milion njerëz janë zhvendosur për shkak të konfliktit ndërmjet Izraelit dhe Hezbollahut, duke shënuar valën më të madhe të shpërnguljeve në historinë e vendit.
"Libani po përjeton valën më të madhe të zhvendosjes në historinë e tij," tha ai në një konferencë për shtyp pas një takimi të komitetit të urgjencës të qeverisë në Bejrut.
“Prioriteti ynë është të ndalojmë agresionin e vazhdueshëm izraelit përmes përpjekjeve të vazhdueshme diplomatike. Nuk kemi zgjidhje tjetër”, theksoi ai.
Mikati ripohoi gjithashtu angazhimin e Libanit ndaj Rezolutës 1701 të Këshillit të Sigurimit të Kombeve të Bashkuara, e cila bën thirrje për një ndërprerje të armiqësive midis Izraelit dhe Hezbollahut.
"Ushtria libaneze është e gatshme të zbatojë rezolutën," tha ai, duke shtuar rëndësinë e parandalimit të përshkallëzimit të mëtejshëm.
Ushtria izraelite ka goditur Libanin që nga 23 shtatori, duke vrarë të paktën 816 njerëz dhe duke plagosur mbi 2 mijë e 500, tha Ministria libaneze e Shëndetësisë.
Hezbollahu dhe Izraeli janë përfshirë në luftë ndërkufitare që nga fillimi i luftës së Izraelit në Gaza.
Të paktën 1 mijë e 673 njerëz janë vrarë që atëherë, duke përfshirë 194 gra dhe 104 fëmijë, dhe mbi 8 mijë e 600 të tjerë të plagosur, sipas autoriteteve libaneze.
Komuniteti ndërkombëtar ka paralajmëruar se sulmet izraelite në Liban mund të përshkallëzojnë konfliktin e vazhdueshëm të Gazës në një luftë më të gjerë rajonale.
