Federata e Basketbollit të Kosovës dhe FIBA prezantojnë fytyrën më të re të projektit, “Her World, Her Rules”, basketbollisten e talentuar të Kosovës, Malvina Haziri.
Me energjinë e saj të pashtershme, përkushtimin dhe pasionin për basketbollin, Malvina përçon një mesazh të fuqishëm për vajzat e reja kudo: me punë të palodhur dhe besim në vetvete, gjithçka është e mundur!
Ajo frymëzon brezat e rinj të ndjekin ëndrrat dhe ambiciet e tyre, duke dëshmuar se sporti nuk është vetëm lojë, por edhe një rrugë drejt suksesit dhe fuqizimit personal.
"Her World, Her Rules" është një projekt i iniciuar nga FIBA që ka për qëllim të promovojë dhe të rrisë pjesëmarrjen e vajzave në basketboll në mbarë botën. Ky projekt synon të fuqizojë vajzat përmes sportit, të krijojë mundësi të barabarta dhe të nxisë zhvillimin e talenteve të reja në këtë fushë.
Në Kosovë, ky program ka marrë përkrahje të madhe, duke përfshirë aktivitete si kampe trajnimi, turne promovues dhe evente për ndërgjegjësimin mbi rëndësinë e sportit në jetën e vajzave të reja. Slogani "Her World, Her Rules" përçon mesazhin se vajzat kanë fuqinë të udhëheqin, të plotësojnë ëndrrat e tyre dhe të vendosin rregullat e lojës në jetën e tyre..
