Andrew Tate dhe vëllai i tij Tristan kanë lënë Rumaninë me një fluturim drejt Shteteve të Bashkuara, sipas avokatit të tyre, i cili e tha këtë për CNN.
Dyshja ishin arrestuar në këtë shtet tre vjet më parë dhe përballen atje me akuza për përdhunim, trafikim njerëzish dhe pastrim parash.
Emory Andrew Tate III mori famë në 2016 kur u largua nga emisioni britanik "Big Brother" pas shfaqjes së një videoje ku dukej të sulmonte një grua me një rryp.
Në vitet pasuese, ai u bë një krijues i përmbajtjes online që shkaktoi polemika dhe në një moment u pezullua nga platformat kryesore sociale për komentet e tij të dëmshme rreth dhunës seksuale.
Andrew dhe vëllai i tij më i ri, Tristan Tate, 36 vjeç, u arrestuan fillimisht në Bukuresht në dhjetor 2022. Ata akuzohen për formimin e një grupi kriminal të organizuar, trafikim njerëzor, trafikim të të miturve, pastrim parash - akuza që ata i mohojnë.
Një rast i parë penal kundër vëllezërve dështoi në dhjetor të vitit 2024, kur një gjykatë në Bukuresht vendosi të pezullonte gjyqin për shkak të mangësive në aktin e akuzës.
Një gjykatë rumune e hoqi urdhrin e arrestit në shtëpi për Tate në janar, duke e zëvendësuar me kushte të tjera, si kontrolle të rregullta nga policia.
Në tetor, gjykata vendosi që ai të merrte përsëri makinat luksoze, vlera e të cilave është rreth 4 milionë euro.
Vëllezërit Tate ishin ndaluar të linin Rumaninë gjatë hetimeve, por pasi u hoqën kufizimet dhe ata lanë vendin, avokati i viktimave të supozuara të Tates në Britani, Matthew Jury, tha për CNN se çdo sugjerim që ata do të përballen me drejtësi në Rumani është i pabesueshëm.
Avokati akuzoi qeverinë amerikane për "lobim" për lirimin e Tate-vë. Sipas raportimeve të Financial Times, zyrtarët amerikanë kishin bërë presion mbi autoritetet rumune për të hequr kufizimet.
Vëllezërit Tate përballen gjithashtu me akuza për krime seksuale në Britani, të cilat ata i mohojnë.
Katër gra në Mbretërinë e Bashkuar që akuzojnë Andrew Tate për përdhunim dhe kontroll të detyrueshëm, dhe që kanë ngritur një çështje civile kundër tij, thanë se lajmi për largimin e tyre nga Rumania i ka "ri-traumatizuar".
