Një aksident i rëndë rrugor në Itali i ka marrë jetën një emigranti shqiptar, i cili nuk mundi t’u mbijetojë plagëve të marra pas përplasjes.
Viktima është identifikuar si Maksim Sinani, 33 vjeç, banor i Altopascios në Itali.
Ngjarja e rëndë ka ndodhur në zonën e Pistoias, ku shqiptari ishte duke udhëtuar me motoçikletën e tij kur u përplas me një automjet që vinte nga drejtimi i kundërt.
Përplasja ka qenë e fortë dhe 33-vjeçari ka marrë plagë të rënda.
Ai u transportua menjëherë në spital për ndihmë mjekësore, por gjendja e tij u përkeqësua dhe gjatë natës humbi jetën.
Maksim Sinani jetonte prej kohësh në Itali, ndërsa lajmi për ndarjen e tij nga jeta ka tronditur familjarët dhe komunitetin ku ai banonte.
Autoritetet italiane vijojnë hetimet për të zbardhur rrethanat e plota të aksidentit dhe për të përcaktuar dinamikën e përplasjes mes motoçikletës dhe automjetit.
