Ministrat e Jashtëm të Gjermanisë, Francës dhe Polonisë kanë dënuar “përdorimin joproporcional të forcës” kundër protestuesve pro-BE në Gjeorgji, ndërsa vala e trazirave vazhdon për natën e dhjetë.
Në deklaratën e tyre të përbashkët, tre ministrat e jashtëm – Annalena Baerbock, Jean-Noël Barrot dhe Radoslaw Sikorski – bënë thirrje për lirimin e menjëhershëm të anëtarëve të opozitës.
Bëhet e ditur se më shumë se 400 protestues, duke përfshirë liderë të opozitës dhe të paktën 50 gazetarë, janë arrestuar, ndërsa mbi 100 persona janë trajtuar për lëndime.
Ministrat kërkuan që të drejtat themelore, duke përfshirë lirinë e tubimit paqësor dhe lirinë e shprehjes, duhet të ruhen dhe mbrohen sipas kushtetutës së Gjeorgjisë dhe angazhimeve ndërkombëtare, shkruan euronews, përcjell Telegrafi.
Gjermania, Franca dhe Polonia i kërkuan gjithashtu partisë në pushtet Georgian Dream që të qetësojë tensionet dhe të hapë një dialog gjithëpërfshirës me të gjitha forcat politike dhe përfaqësuesit e shoqërisë civile.
“Ne theksojmë vendosmërinë tonë për të mbështetur aspiratat demokratike dhe evropiane të popullit gjeorgjian”, thuhet në deklaratë.
Siç raportohet, dhunën e përdorur kundër protestuesve në Gjeorgji e ka dënuar edhe SHBA-ja.
Duke folur në një konferencë të Organizatës për Siguri dhe Bashkëpunim në Evropë, Sekretari i Shtetit, Antony Blinken denoncoi atë që ai e përshkroi si një “represion brutal të atyre që bëjnë thirrje që vendi i tyre të qëndrojë në rrugën e lidhjeve më të ngushta me Evropën”.
Ndryshe, protestat fillestare kundër zgjedhjeve në Gjeorgji morën një dimension të ri pas vendimit të Georgian Dream për të pezulluar bisedimet e pranimit në BE të paktën deri në vitin 2028.
Vendimi për të pezulluar bisedimet e pranimit ishte në përgjigje të një rezolute të Parlamentit Evropian që kritikoi zgjedhjet si të lira dhe as të ndershme.
Vëzhguesit ndërkombëtarë thonë se panë raste dhune, ryshfeti dhe votimi të dyfishtë në qendrat e votimit, duke nxitur disa ligjvënës të BE-së të kërkojnë një rivotim.
BE-ja i dha Gjeorgjisë statusin e kandidatit në dhjetor 2023 me kusht që ajo të përmbushte rekomandimet e bllokut, por Brukseli e vuri atë proces në pritje në fillim të këtij viti pas miratimit të një ligji të diskutueshëm të “ndikimeve të huaja”, i cili u pa gjerësisht si një goditje për liritë demokratike.
