Moska i ka kërkuar Ankarasë ndihmë në tërheqjen e sigurt të trupave ruse nga Siria pas rënies së regjimit të diktatorit Bashar al-Assad, raportoi CNN Türk më 9 dhjetor, duke cituar burimet e veta.
Kontigjenti ushtarak rus thuhet se do të tërhiqet nga të gjitha pjesët e Sirisë, me përjashtim të bazës ajrore strategjike Hmeimim dhe bazës detare Tartus në bregdetin e Mesdheut.
Ushtarët rusë fillimisht do të transportohen në zonat e kontrolluara nga ushtria turke, dhe më pas do të kthehen në Rusi.
Kjo pason një raport të mëparshëm nga agjencia ruse TASS, në të njëjtën ditë që Bashar al-Assad dhe familja e tij kishin mbërritur në Moskë dhe kishin marrë azil “për arsye humanitare”.
Përleshjet mes forcave besnike të diktatorit sirian Bashar al-Assad dhe grupeve të armatosura të opozitës, filluan më 27 nëntor në zonat rurale të provincës Alepo në Sirinë veriore.
Ofensiva u zhvillua me shpejtësi, me rebelët që pushtuan qytet pas qyteti. Në mëngjesin e 8 dhjetorit, forcat opozitare hynë në Damask pa luftë.
Bashar al-Assad ka qeverisur vendin për 24 vjet, duke pasuar babanë e tij Hafez al-Assad, i cili mori pushtetin në një grusht-shtet ushtarak në vitin 1970.
Një revolucion filloi në Siri në vitin 2011, i cili u përshkallëzua në një luftë civile që përfshin opozitën, islamistët radikalë dhe regjimin e Asadit, i cili mbështetej nga trupat ruse
