Atmosfera te Vllaznia, kreu sjell entuziazëm në kampin shkodran!
Momenti i mirë që po kalon Vllaznia në kampionat, me tri fitore radhazi, sigurisht që e ka ngrohur jo pak atmosferën në kampin shkodran.
Në radhët e lojtarëve ka besim për një ecuri të mirë edhe në vazhdim të kampionatit, edhe pse përpara është një ndeshje e vështirë, si ajo me Dinamon. Sfida luhet ditën e diel, ora 19:00 në “Elbasan Arena”.
Dihet që ana psikologjike ka të bëjë shumë në futboll dhe te Vllaznia duan ta përdorin atë si një “armë” më shumë për ta zgjatur sa më shumë të jetë e mundur serinë e fitoreve. Nuk është fjala për eufori, por për një situatë të këndshme, që vjen si rezultat i asaj çfarë Vllaznia ka prodhuar në fushë në këto javë të fundit.
