Thiago Motta është i ndërgjegjshëm që ndeshja ndaj Mançester Sitit në Ligën e Kampioneve do të jetë shumë e vështirë, si për shkak të pozicionit të dy skuadrave aktualisht në renditjen e turneut, ashtu edhe për faktin se britanikët e drejtuar nga Pep Guardiola janë një ndër ekipet më të forta në qarkullim.
Trajneri i Juventusit, sot ka dalë para gazetarëve në konferencën për mediat para sfidës, duke theksuar se nuk i sheh në krizë kundërshtarët e radhës, ashtu sicc beson se ekipi i tij mund të përmirësohet ndjeshëm.
“Ndeshja me Sitin do të jetë një mundësi e madhe për ne. Të komandosh ndeshjen nuk do të thotë vetëm mbajtje topi, çdo skuadër ka karakteristikën e saj. Siti mban topin dhe vjen në sulm me shumë lojtarë, ne duhet të jemi gati kur kemi topin dhe të luajmë me cilësi të madhe.
Siti në krizë? Nuk mund të gjykoj atë që ndodh, po flasim për një skuadër që ka fituar gjithçka, kanë bërë diçka të jashtëzakonshme, është relative të flasësh për krizë. Guardiola është shumë i fortë dhe janë faktet që e tregojnë, ka fituar gjithçka dhe me vazhdimësi.
Barazimet tona radhazi? Deri tani kemi humbur vetëm një ndeshje në Champions, duhet të vazhdojmë kështu, por mund të përmirësohemi në çdo aspekt, kemi potencialin për ta bërë një gjë të tillë. Nuk e kam përdorur asnjëherë alibinë e dëmtimeve, nuk besoj në gjëra të tilla. Gjëja e rëndësishme është si përballesh me situatat dhe ne e kemi bërë si skuadër”, tha ndër të tjera Mota para gazetarëve.
