Egnatia do të luajë këtë të diel përballë Teutës në transfertë, sfidën e vlefshme për javën e 18-të të Superiores. Ndeshja që do të zhvillohet në stadiumin “Niko Dovana”, nis në orën 16:30. Në prag të kësaj sfide ka folur dhe trajneri i rrogozhinasve, Edlir Tetova.
Tekniku i kampionëve thotë se grupi është pothuajse i plotë, përveç Renato Malotës dhe sulmuesi Yahaya. Ndër të tjera, Tetova thekson se çdo 3 pikësh në kampionat është i rëndësishëm.
“Vijmë nga disa ndeshje me rezultate të mira, shpresojmë të kemi vazhdimësi, jemi përgatitur për ndeshjen me Teutën. Grupi është i plotë përveç Malotës dhe Yahaya që janë të dëmtuar. Skuadrat aty janë, kemi akoma shumë javë do luftojmë që ta mbrojmë vendin e parë. Mendoj të kemi vazhdimësi dhe çdo gjë të jetë në rrugë të mirë.
Ka qenë një javë e gjatë, falë çunave kaluam mirë dhe shpresoj të jemi njësoj dhe këtë javë. Çdo 3 pikësh është shumë i rëndësishëm, duhet të fokusohemi në ndeshjet në vijim. Nuk kemi fituar me Teutën në asnjë ndeshje në drejtimin tim, shpresoj të ndodh e kundërta. Kontigjenti është i gatshëm të përballojë ndeshjen me Teutën.
Jemi kampionët në fuqi, me investimet që janë bërë e meritojmë të kemi këtë stadium dhe shpresojmë sa më shumë tifozë të jenë të pranishëm. Momentin që ke një plan në kokë duhet të bindësh drejtuesit dhe gjithçka bëhet më e lehtë”, është shprehur Edlir Tetova.
