Një ngjarje e rëndë është regjistruar në burgun e Straubingut në Gjermani, ku një i burgosur ka humbur jetën rreth një vit e gjysmë pas një sulmi të dyshuar nga një bashkëvuajtës, shkruan media gjermane.
Sipas policisë gjermane, incidenti kishte ndodhur në dhjetor të vitit 2024, kur një 46-vjeçar dyshohet se ishte sulmuar në qelinë e tij nga një tjetër i burgosur. Ai ishte gjetur i plagosur nga bashkëvuajtës të tjerë, të cilët kishin njoftuar menjëherë personelin e burgut.
Më pas, viktima ishte dërguar në spital dhe kishte qëndruar për një kohë të gjatë në trajtim mjekësor, deri në vdekjen e tij më 2 maj.
Prokuroria e Regensburgut ka ngritur aktakuzë ndaj një 43-vjeçari me shtetësi shqiptare, i dyshuar për tentativë vrasjeje. Aktualisht, autoritetet po hetojnë nëse sulmi i vitit 2024 ka qenë shkaku direkt i vdekjes së të burgosurit.
