Një zyrtar policor ka pësuar lëndime trupore pasi u godit nga një automjet që u përpoq të shmangte një kontroll policor në qytetin e Klinës. Ngjarja ndodhi të hënën rreth orës 11:40, kur njësiti policor kishte ndaluar një veturë në kuadër të detyrave të rregullta të kontrollit rrugor.
Sipas Policisë së Kosovës, shoferi i automjetit të ndaluar refuzoi t’i nënshtrohej kontrollit dhe, në momentin që iu komunikua kërkesa zyrtare, ai ndezi veturën me vrull dhe u largua nga vendi, duke goditur njërin prej zyrtarëve policorë.
Polici i lënduar ka marrë trajtim mjekësor, ndërsa i dyshuari u identifikua dhe arrestua pas veprimeve të menjëhershme hetimore nga autoritetet.
“Klinë / 13.10.2025 – 11:40. Është raportuar se njësiti policor deri sa ishte në kryerje të detyrës zyrtare kanë ndaluar një automjet dhe pasi i është kumtuar se duhet ti nënshtrohet kontrollit policor, i dyshuari me vrull ka nisur veturën dhe është larguar nga vendi i ngjarjes, duke I shkaktuar lëndime trupore zyrtarit policor, I cili ka pranuar tretman mjekësor”, thuhet në raportin 24 orësh të Policisë së Kosovës.
Me vendim të prokurorit të shtetit, i dyshuari është dërguar në mbajtje dhe do të përballet me akuzat për pengim të personit zyrtar gjatë kryerjes së detyrës zyrtare, si dhe shkaktim të lëndimeve trupore.
