Drejtori i Zyrës Qeveritare të Serbisë për Kosovën, Petar Petkoviq, ka reaguar ndaj deklaratës së Kryeministrit të Kosovës, Albin Kurti, i cili tha se Putini e Vuçiqi më nuk kanë nevojë as që të takohen, pasi marrëveshjet po i arrijnë përmes bisedave telefonike.
Petkoviq, përmes një postimi në Twitter, tha se Kurti është i mërzitur kur Vuçiqi arrin të negocojë më të mirën për serbët përmes telefonit.
“Pas një ekskursioni të pasuksesshëm në ShBA, Albin Kurti është i mërzitur kur Aleksander Vuçiq arrin të negocojë me të mirën për serbët përmes telefonit”, ka shkruar Petkoviq në Twitter.
Sipas tij, dihet se Vuçiqi është problemi më i madh i Kurtit, por siç thotë ai, më mirë është për Kurtin të sigurojë ushqim e ngrohje për kosovarët sesa ta sulmojë Vuçiqin.
Në vend që të sulmojë Vuçiqin, Albin Kurti do të ishte më mirë të sigurojë ushqim dhe ngrohje për shqiptarët e Kosovës. Ne e dimë që Vuçiqi është problemi i tij më i madh!”, shtoi ai.
