Artan Grubi, që u fut në listën e zezë të Shteteve të Bashkuara të Amerikës, ka thënë se e ka prekur vendimi, duke u shprehur se si person publik “ia ka kushtuar jetën mbrojtjes së vlerave demokratike perëndimore”.
Ish-zëvendëskryeministri i Maqedonisë së Veriut ka shkruar në Facebook të hënën se do të angazhohet maksimalisht me miqtë dhe partnerët “për të zbardhur plotësisht këtë çështje”.
“Në mungesë të informacionit të detajuar, u njoha nga mediat për vendimin e sotëm të Departamentit të Shtetit. Si një person që jetën time publike ia kam kushtuar mbrojtjes së vlerave demokratike perëndimore dhe që gjithmonë kam punuar me përkushtim për anëtarësimin e vendit në NATO dhe Bashkimin Europian, ky vendim më prek drejtpërdrejt dhe personalisht”, tha ai.
Grubi tha se do të angazhohet me gjithë përkushtim dhe maksimalisht, së bashku me miqtë dhe partnerët tanë, me të cilët kanë ndarë vizionin dhe punuar ndër vite për integrimin e vendit në strukturat euroatlantike, për të zbardhur plotësisht këtë çështje.
“Transparenca dhe përkushtimi ndaj vlerave demokratike do të vazhdojnë të jenë shtylla kryesore e çdo veprimi tim”, tha ai.
