Festivali i Këngës së fundmi ka sjellë një debat të pazakontë që po përqendrohet jo te performanca artistike, por te një problem teknik që ka prekur këngën “Karnaval” të Elvana Gjatës.
Videoja e këngës, e ngarkuar në kanalin zyrtar të RTSH-së, shoqërohet me zhurma të pakuptueshme, të cilat pengojnë dëgjimin normal të këngës. Kjo situatë ka shkaktuar një valë reagimesh të ashpra nga fansat e këngëtares dhe publiku i gjerë.
Edhe vetë Elvana Gjata reagoi përmes një postimi në Instagram, duke shprehur habinë dhe shqetësimin për këtë çështje. Këngëtarja theksoi se nuk e kupton arsyen e këtij problemi dhe nuk ka mundësi për ta zgjidhur, pasi videoja është publikuar nga RTSH dhe jo nga kanali i saj personal.
“Sërish, nuk mund ta di dhe ta kuptoj pse po ndodh kjo, por mund ta them me siguri që s’e kam parë kurrë diçka të tillë të ndodhë. Në çdo rast, nuk kam çfarë të bëj për këtë gjë, sepse kënga nuk është në kanalin tim. Po vlerësojmë opsionet tona. Ju dua të gjithëve dhe faleminderit që po kujdeseni,” shkroi ajo.
