Fituesi i Oscar-it, Gene Hackman (95 vjeç) dhe gruaja e tij Betsy Arakawa (64 vjeçe), u gjetën të vdekur në shtëpinë e tyre në Santa Fe të mërkurën.
Vajza e Gene Hackman beson se babai i saj dhe gruaja e tij vdiqën nga helmimi me monoksid karboni.
Elizabeth Jean Hackman i tha TMZ se ndërsa ata janë ende të pasigurt për shkakun e vdekjes së Hackman dhe gruas së tij, dyshojnë se mund të ketë qenë për shkak të thithjes së gazeve toksike.
Aktori, gruaja e tij ishin tashmë të vdekur kur oficerët hynë në shtëpi, konfirmoi zëdhënësja e Zyrës së Sherifit të Qarkut Santa Fe, Denise Avila.
Sherifi i Santa Fe, Adan Mendoza shtoi se autoritetet janë “në mes të një hetimi paraprak për shkakun e vdekjes”, i cili mbetet “aktiv dhe në vazhdim”.
Ai tha gjithashtu se hetuesit gjetën dy qen të tjerë në shtëpinë e Hackman që mbijetuan.
Hackman, dy herë fitues i Oscar-it me një pasuri të vlerësuar prej 80 milionë dollarësh, festoi ditëlindjen e tij të 95-të në fund të janarit. Ai ka jetuar një jetë të izoluar për 20 vitet e fundit, pasi u tërhoq nga aktrimi në vitin 2004.
U largua po ashtu nga Los Angeles dhe u transferua në New Mexico, ku bëri një jetë të qetë larg syrit të publikut.
Kishte tre fëmijë nga martesa e tij e parë me Faye Maltese. Betsy Arakawa është gruaja e dytë e Hackman. Ai dhe Arakawa ishin martuar për tridhjetë vitet e fundit.
Ata u martuan në vitin 1991 dhe Arakawa drejtonte një dyqan mobiljesh luksoze në Santa Fe.
