Kryeministri i Republikës së Kosovës, Albin Kurti, së bashku me ministrin e Kulturës, Rinisë dhe Sportit, Hajrulla Çeku, vizitoi sot në Pejë Kullën e Mahmutbegollëve, e cila ndodhet në fazën përfundimtare të restaurimit.
Ky objekt historik, i ndërtuar në shekullin XVIII, është një nga asetet e trashëgimisë kulturore që po restaurohet me financim nga Ministria e Kulturës, në vlerë prej 271 mijë eurosh.
Punimet nisën në korrik të vitit të kaluar dhe tashmë janë afër përfundimit.
Qeveria e Kosovës e ka cilësuar këtë projekt si një dëshmi të angazhimit të saj për mbrojtjen dhe rifunksionalizimin e objekteve të trashëgimisë kulturore në rrezik.
Restaurimi i Kullës së Mahmutbegollëve synon jo vetëm ruajtjen e historisë dhe arkitekturës tradicionale, por edhe promovimin e saj si pjesë e turizmit kulturor në Pejë.
