Këshilli i Bashkimit Evropian (BE), pritet të miratojë më 17 dhjetor draft-konkluzat, lidhur me Kosovën dhe procesin e dialogut Kosovë-Serbi.
BE-ja do t’i kërkojë Kosovës që, pa vonesa, të dorëzojë në Gjykatën Kushtetuese draft-statutin për Asociacionin e Komunave me shumicë serbe, sipas propozimit evropian.
Këshilli mirëpret përkushtimin e dy vendeve ndaj procesit të normalizimit të marrëdhënieve dhe thekson zbatimin e të gjitha marrëveshjeve të arritura deri tani.
Në draft-konkluza thuhet se masat e BE-së kundër Kosovës mbeten në fuqi për shkak të mungesës së veprimeve të mjaftueshme për të ulur tensionet. BE-ja është e gatshme t’i heqë masat, nëse Kosova përmbush kërkesat.
Por, këto konkludime i ka kundërshtuar ish-ambasadori i Holandës në Kosovë Robert Bosch. Për gazetën “Bota sot”, ai ka akuzuar Komisionin Evropian për trajtim jo të barabartë ndaj Kosovës dhe Serbisë.
Vendosjen e masave ndëshkuese kundër Kosovës, diplomati e sheh si të padrejtë, duke marrë parasysh që bazohen në një qasje të anshme nga komisioni i kaluar, i udhëhequr nga Miroslav Lajçak.
Sipas tij, Kosova duhet të bëjë përpjekje shtesë për të bindur dhe fituar mbështetjen e udhëheqësve të rinj politikë në BE.
“Mendoj se kam shkruar shumë herë që Komisioni i BE-së është jo objektiv: Kosova duhet t'i përmbushë të gjitha obligimet, ndërsa Serbia pothuajse asnjë.
Që ka sanksione në radhë të parë, tashmë është e papranueshme pasi bazohet në mos neutralitetin e komisionit të mëparshëm me Lajçakun. Shpresoja se i riu do të jetë më i paanshëm, por nsigurisht nëpunësit civilë të BE-së janë ende të njëjtë.
Pra, shumë punë për të bërë që Kosova të bindë të emëruarit e rinj politikë”, ka deklaruar Bosch për “Bota sot”.
Në draft-konkluzat, BE-ja shpreh shqetësim për tensionet në veri të Kosovës dhe kërkon përpjekje të qëndrueshme nga të dyja palët për de-përshkallëzim, shmangien e retorikës përçarëse dhe ndalimin e veprimeve provokuese.
Këshilli dënon sulmet e fundit në veri, përfshirë incidentin në kanalin Ibër-Lepenc dhe sulmet ndaj KFOR-it dhe policisë më 29 maj, si dhe ngjarjen e 24 shtatorit në Banjskë.
Poashtu, BE-ja rikonfirmon përkrahjen për punën e Dhomave të Specializuara dhe Zyrës së Prokurorit të Specializuar në Kosovë si dhe mirëpritet përkushtimi i Kosovës për reformat dhe integrimin evropian.
Këto konkluza pritet të miratohen në nivel ministror dhe më pas të mbështeten nga liderët e BE-së në samitin e ardhshëm.
