Nënkryetari i Komunës së Prishtinës, Alban Zogaj, ka dënuar ashpër veprimin e asamblistit të Lëvizjes Vetëvendosje, Gëzim Sveçla, i cili shkuli mikrofonin gjatë një seance të jashtëzakonshme të Kuvendit Komunal pas votimit të buxhetit vjetor.
Në RTV Dukagjini, Zogaj e cilësoi incidentin si “të paprecedent” dhe një akt vandalizmi që prishi rrjedhën normale të punimeve të seancës.
Zogaj theksoi se gjatë tre viteve të fundit janë përpjekur të krijojnë një mjedis qytetar dhe demokratik në kuvend, por ngjarja e fundit, sipas tij, është një prishje e rëndë e këtyre përpjekjeve. “Ishte tendencë e qëllimshme për të penguar procesin demokratik dhe për të ndikuar në lirinë e asambleistëve për të votuar sipas vullnetit të tyre të lirë,” tha ai.
Zogaj nënvizoi se ka mënyra të ndryshme të manifestimit të pakënaqësive, si abstenimi apo debatet në foltore, por jo përmes veprimeve të dhunshme që dëmtojnë integritetin e institucioneve lokale.
Pas incidentit, Gëzim Sveçla është ndaluar nga organet e rendit për 48 orë. Veprimi i tij ka ngjallur reagime edhe nga figura të tjera politike.
Gëzim Mehmeti nga radhët e AKR-së e ka quajtur një “shkelje të rëndë të demokracisë” çdo përpjekje për të ushtruar ndikim partiak në vendimet e Kuvendit Komunal. Në një postim në Facebook, Mehmeti theksoi rëndësinë e ruajtjes së integritetit dhe pavarësisë së asambleistëve si përfaqësues të popullit.
“Demokracia është e fortë vetëm kur respektohet vullneti i qytetarëve dhe kur asambleistët punojnë në shërbim të tyre pa presione dhe ndikime partiake,” shkroi Mehmeti.
Ky incident ka hapur debat të gjerë mbi etikën dhe demokracinë në institucionet lokale, duke ngritur pyetje për mekanizmat që garantojnë respektimin e rregullave dhe të drejtave të përfaqësimit.
