Visar Alimehaj ka dhënë dorëheqje të parevokueshme nga Komiteti i Arbitrazhit të Federatës Ndërkombëtare të Arteve Mikse Marciale – IMMAF.
Shkaku i dorëheqjes ishte rikthimi i Rusisë në gara të kësaj federate.
Alimehaj tregon arsyet e dorëheqjes për gazetën kombëtare “Bota sot”: “Sot kam dhënë dorëheqje të parevokueshme nga Komiteti i Arbitrazhit të Federatës Ndërkombëtare të Arteve Mikse Marciale - IMMAF.
Arsyeja është sepse IMMAF e ka kthyer në gara Rusinë të cilën e kemi përjashtuar që nga fillimi i luftës në Ukrainë dhe Kosova ka qenë një nga Federatat e para që e pati kërkuar përjashtimin e Rusisë”.
Alimehaj ka treguar edhe letrën që i ka dërguar federatës ndërkombëtare.
“Po ju drejtohem për të paraqitur dorëheqjen time të parevokueshme nga Komisioni i Arbitrazhit i Federatës Ndërkombëtare të Arteve Marciale të Përziera (IMMAF), me efekt të menjëhershëm.
Ky vendim vjen si pasojë e rikthimit të fundit të Unionit të MMA-së së Rusisë përpara Kampionatit Botëror për të Rinj 2025. Rusia ishte pezulluar më parë për shkak të luftës së vazhdueshme në Ukrainë — një luftë që, sipas Kombeve të Bashkuara, ka rezultuar me mbi 10,000 viktima civile të konfirmuara, ndërsa numri real ka gjasa të jetë dukshëm më i lartë.
Në këtë kontekst, e konsideroj vendimin për rikthimin e Rusisë thellësisht shqetësues dhe në kundërshtim me parimet themelore të përgjegjësisë, integritetit dhe respektit që sporti ndërkombëtar duhet të përfaqësojë.
Pas një shqyrtimi të kujdesshëm, kam arritur në përfundimin se nuk mund të vazhdoj më në rolin tim në Komisionin e Arbitrazhit duke mbetur besnik ndaj këtyre parimeve.
Dëshiroj t’ju falënderoj për mundësinë për të shërbyer, si dhe për bashkëpunimin dhe përvojat profesionale që kam fituar gjatë kohës sime në këtë Komision”, - ka shkruar në letrën e tij Alimehaj.
