Shërbimet me abonim nuk kanë dhënë rezultate për kompanitë e tjera të mediave sociale, siç është X i Elon Muskut.
Aplikacioni social Bluesky po punon për veçori shtesë të paguara që do të jenë të disponueshme për përdoruesit me abonim mujor.
Në platformën për zhvillues GitHub, ekipi i Bluesky po eksperimenton me shtesa për të cilat përdoruesit do të paguanin për qasje.
Këto shtesa përfshijnë një emblemë për profilin Bluesky, analiza, ngarkime më të gjata videosh dhe personalizime të profilit.
Megjithatë, Bluesky ka deklaruar në GitHub se është një dizajn i ndërfaqes për përdoruesit dhe veçoritë e paguara mund të ndryshojnë përpara prezantimit, shkruan euronews.
Dizajnet e këtyre shtesave janë të çmuara me 8 dollarë (7.50 euro) në muaj ose 72 dollarë në vit (68 euro) për paketën Bluesky+, e cila gjithashtu mund të pësojë ndryshime.
Bluesky filloi në vitin 2019 si një iniciativë kërkimore në Twitter, tani i quajtur X, dhe u bë një kompani e pavarur në vitin 2021. Platforma u prezantua për të gjetur një mënyrë për të qëndruar falas për përdoruesit pa përdorur reklamat dhe ka deklaruar se nuk dëshiron të “kërkojë shitjen e të dhënave të përdoruesve për reklama” për të siguruar të ardhura.
Ku është Bluesky? Jo këtu, thonë rregullatorët mediatikë irlandezë dhe holandezë.
Platforma ka parë një rritje masive të përdoruesve dhe një rritje mbi 500 për qind të përdorimit në Shtetet e Bashkuara muajt e fundit. Ajo së fundmi kaloi 20 milionë përdorues globalisht, duke shënuar një rritje të madhe nga 9 milionë përdorues globalë në shtator.
“Abonimet janë hapi i parë”, tha CEO i Bluesky, Jay Graber, për Wired javën e kaluar në një intervistë.
Megjithatë, përpjekjet për modelet me bazë abonimin nuk kanë rezultuar të suksesshme për kompanitë e tjera të mediave sociale.
Elon Musk ka provuar të rrisë abonimet e paguara me X Premium dhe të zvogëlojë varësinë e platformës nga të ardhurat nga reklamat.
Sidoqoftë, sipas një raporti në tetor nga kompania e inteligjencës për aplikacione Appfigures, X ka gjeneruar rreth 200 milionë dollarë (190 milionë euro) të ardhura nga blerjet brenda aplikacionit për iOS dhe Android që nga prezantimi i abonimit në 2021, atëherë i quajtur Twitter Blue.
CEO i Bluesky gjithashtu sugjeroi së fundmi në një event të TechCrunch se mund të ketë përpjekje të tjera për gjenerimin e të ardhurave, si shitja e emrave të domain-eve, një treg për algoritme dhe ndoshta edhe shitja e reklamave.
