Qindra protestues kanë dalë në rrugët e kryeqytetit të Ukrainës, Kiev, për të kundërshtuar masat kundër COVID-19 dhe programin e detyrueshëm për vaksinim për disa punëtorë.
Protestuesit mbanin pankarta ku shkruhej “‘Jo’ gjenocidit ndaj ukrainasve” dhe “thoni ‘jo’ gënjeshtrave”.
Disa prej tyre po kërkonin gjithashtu lirimin e aktivistit që njihet për kundërshtimin e vaksinimit, Ostap Stakhiv, i cili është arrestuar në qytetin Lviv gjatë javës së kaluar nën akuzat për dëmtimin e shëndetit publik përmes lidhjeve që dyshohet se i ka me Rusinë.
Stakhiv i ka mohuar të gjitha akuzat kundër tij, shkruan BBC.
Në Ukrainë së fundmi është rritur numri i të vaksinuarve për shkak të masave më të ashpra në vende publike për të pavaksinuarit, por megjithatë është akoma një numër i madh i qytetarëve që hezitojnë të vaksinohen.
Vendi po përjeton një valë të re të rasteve me COVID-19 derisa varianti shumë shpejt i transmetueshëm Delta po përhapet nëpër Europë.
Ukraina gjatë ditës së sotme ka raportuar 14,325 raste të reja me koronavirus dhe 595 vdekje.
