Një zjarr shpërtheu në kompleksin rezidencial Broadwalk Urban Village në Midrand, Johannesburg, Afrika e Jugut, duke marrë një jetë dhe duke lënë qindra të pastrehë.
Xolile Khumalo, zëdhënëse për Shërbimet e Menaxhimit të Emergjencave të Johanesburgut (EMS), tha se një ekip kërkimi dhe shpëtimi zbuloi trupin e një gruaje mes rrënojave të mërkurën, duke vënë në dukje se trupi ishte bllokuar nën mbeturinat nga çatia e shembur.
Zjarri filloi pak pas orës 21:00 me orën lokale (1900 GMT), duke prekur rreth 130 apartamente dhe duke plagosur disa banorë ndërsa ata tentuan të arratiseshin. EMS u përgjigj me shpejtësi, duke shuar flakët dhe duke transportuar të plagosurit në spitalet aty pranë.
“Shumica e banorëve u evakuuan në mënyrë të sigurt,” tha Khumalo, duke shtuar se numri i përgjithshëm i banorëve të prekur mbetet i pasigurt dhe zjarrfikësit po kryejnë një kërkim të plotë në çdo dhomë.
“EMS vazhdon t’i nxisë banorët e Johanesburgut që të shqyrtojnë objektet e akomodimit përpara se të marrin vendbanimin dhe të sigurojnë që të gjitha pajisjet elektrike të fiken pas përdorimit,” tha Khumalo.
Po punohet për zbardhjen e shkaqeve të zjarrit.
