Muhsin Hendricks, i konsideruar si “imami i parë në botë që pranoi haptazi se është homoseksual”, është qëlluar për vdekje pranë qytetit jugor Gqeberha në Afrikën e Jugut, ka thënë policia e atjeshme.
Imami, i cili drejtonte një xhami të destinuar si një strehë e sigurt për homoseksualët dhe myslimanët e tjerë të margjinalizuar, ishte në një veturë me një person tjetër të shtunën kur një automjet ndaloi para tyre dhe bllokoi daljen e tyre, tha policia.
“Dy të dyshuar të panjohur me fytyra të mbuluara dolën nga automjeti dhe filluan të qëllojnë me armë në drejtim të automjetit”, tha forca e Kepit Lindor në një deklaratë.
“Pas kësaj ata u larguan nga vendi i ngjarjes dhe shoferi vuri re se Hendricks, i cili ishte ulur në pjesën e pasme të automjetit u qëllua dhe u vra”.
Një zëdhënës i policisë konfirmoi për AFP vërtetësinë e një videoje në mediat sociale, që supozohej të tregonte një vrasje të synuar në Bethelsdorp pranë Gqeberha, e njohur më parë si Port Elizabeth.
“Motivi i vrasjes është i panjohur dhe është pjesë e hetimeve në vazhdim”, tha policia, duke i kërkuar kujtdo që ka informacion të informojë autoritetet e sigurisë.
Hendricks, i përfshirë në grupe të ndryshme mbrojtëse LGBTQ+, doli haptazi si homoseksual në vitin 1996. Dy vjet më vonë ai filloi të organizonte takime në qytetin e tij të lindjes për myslimanët LGBTQ+, të cilët e trajtonin atë si imam të komunitetit të tyre.
“Unë hapa garazhin tim, vura një qilim dhe i ftova njerëzit të pinin çaj dhe të flisnin”, i tha ai Guardian në 2022.
Ai drejtoi xhaminë Al-Ghurbaah në Wynberg pranë vendlindjes së tij, Cape Town. Xhamia ofron “një hapësirë të sigurt në të cilën muslimanët ‘queer’ dhe gratë e margjinalizuara mund të praktikojnë Islamin”, thuhet në ueb-faqen e saj.
Hendricks, subjekt i një dokumentari të vitit 2022 të quajtur Radikali, kishte aluduar më parë për kërcënime kundër tij.
Ai i tha Guardian se ishte këshilluar të punësonte truproja, por tha se kurrë nuk kishte frikë nga sulmet dhe këmbënguli se “nevoja për të qenë autentik” ishte “më e madhe se frika për të vdekur”.
Hendricks, i cili kishte punuar si mësues i gjuhës arabe dhe stilist, ka lindur në një familje myslimane. Ai u martua me një grua, pati fëmijë, më pas u divorcua para se t’ia zbulonte seksualitetin e tij familjes së tij, tetë vjet pasi i ati i vdiq.
Afrika e Jugut ka një nga normat më të larta të vrasjeve në botë, me 28,000 vrasje në vit deri në shkurt 2024, sipas të dhënave të policisë.
