Instituti i Kosovës për Drejtësi ka publikuar një raport të titulluar “Politikë e ‘kriminalizuar’”, në të cilin është paraqitur një listë me numrin e zyrtarëve komunalë të partive politike që kanë probleme me ligjin.
Raporti thotë se Partia Demokratike e Kosovës prin me zyrtarë të akuzuar (69 të tillë), Lidhja Demokratike e Kosovës është e dyta me 41 zyrtarë të akuzuar, Aleanca për Ardhmërinë e Kosovës me 16, Nisma me 13 dhe në vendin e pestë renditen Lëvizja Vetëvendosje me 9 zyrtarë të akuzuar në nivel lokal.
Publikimi i këtij raporti ka nxitur reagime nga Lëvizja Vetëvendosje. Anëtarja e Kryesisë së LVV-së Albulena Haxhiu, ka akuzuar mediat se nuk po tregohen profesionale.
“Kjo nuk është as gazetari dhe as nuk ka të bëjë asgjë me profesionalizmin!”, ka shkruar ajo në një postim në Facebook.
Ndaj lajmit ka reaguar edhe Shkëlzen Gashi, ish-këshilltar i Albin Kurtit. Edhe ai ka akuzuar mediat se lajmin e kanë shkruar vetëm për VV-në, duke e ilustruar vetëm me fotografinë e Albin Kurtit, e jo të liderëve të partive tjera, që prijnë në listë.
Postimi i tij:
Qenka publikuar një raport i titulluar “Politikë e ‘kriminalizuar’”, në të cilin mes tjerash qenka edhe një listë me numrin e zyrtarëve komunalë të partive politike që kanë probleme me ligjin.
Një ‘medium’ i afërt me partitë politikë që e sunduan Kosovën për këto dy dekada, paska publikuar një artikull për këtë raport, të shoqëruar me fotografinë e liderit të LVV-së, me titull:
“Politikë e ‘kriminalizuar'”, Vetëvendosje me 9 zyrtarë të akuzuar në nivel lokal
Por, raporti po thotë që zyrtarë të akuzuar në nivel lokal, PDK i ka 69, LDK 41, AAK 16, NISMA 13, e LVV 9.
Në titull të këtij artikulli nuk është as PDK, as LDK, as AAK, e as NISMA, por LVV, dhe në fotografinë që e shoqëron këtë artikull nuk është as lideri i PDK-së, as i LDK-së, as i AAK-së e as i NISMA-s, por i LVV-së.
