Arbër Zaimi nga Lëvizja Vetëvendosje, ka thënë se fitorja e kësaj partie në zgjedhjet e 14 shkurtit, do të jetë e treta.
Ai ka thënë se Albin Kurti do të jetë kryeministër me legjitimitet popullor më të fortë dhe figurë më të pastër se të gjithë kryeministrat e pasluftës.
Zaimi në shkrimin e tij, ka përmendur fitoren e VV-së në Mitrovicë që ishte bastion i PDK-së dhe atë në Podujevë, ku historikisht kishte fituar gjithmonë LDK-ja, përcjell Bota sot.
Postimi i plotë i Zaimit në Facebook:
Në 2017 Lëvizja fitoi, por u prodhua PSD-ja e cila me rolin e vet si kinse-opozitë mbajti 2 vite në pushtet një kryeministër pa vota, si Ramushi.
Në 2019, Lëvizja fitoi sërish, dhe bëri qeverinë në koalicion me LDK-në. Kësaj radhe kapësit e shtetit nuk prodhonin dot më “PSD”, sepse për të gjithë u bë e qartë se me taktika të tilla VV nuk dëmtohej, ndërsa personave që dilnin prej saj, u digjej karriera politike. Prandaj kësaj radhe u prodhua ndarje në LDK, mes atyre që donin vazhdimin e korrupsionit qeverisës, dhe atyre që ishin kundër kapjes së shtetit. Kësaj radhe rolin e kinse-opozitës që mban në pushtet një kryeministër pa vota, e mori PDK-ja e cila arriti ta bëjë jo më shumë se gjashtë muaj atë që PSD-ja bëri dy vite me radhë. PDK-ja e kuptoi se, me veprimin si kinse-opozitë, po shkonte rrugës së PSD-së.
Por Lëvizja tash është dyfishuar. VV fitoi votat e shqiptarëve në Mitrovicë të Veriut, ku kishte fituar gjithnjë PDK-ja. VV fitoi 52% dhe pa balotazh në Podujeve, ku historikisht ka fituar vetëm LDK-ja. Të gjithë sondazhet qofshin metodikë qofshin mediatikë, parashikojnë fitore të Lëvizjes rreth 50% (dhe Lëvizja në historinë e saj gjithmonë ka dalë 5-7% më lart se sondazhet në zgjedhje). Të gjitha partitë janë shprehur se Lëvizja do të fitojë. Madje edhe Batoni e Berati. Të gjitha partitë janë shprehur se dëshirojnë të qeverisin me VV. E vetëm kur VV ua bëri me dije se nuk ka nevojë për to, nisën fushatën e sharjeve.
Fitorja e Lëvizjes në vitin 2021 do të jetë e treta e vërteta. Albin Kurti do të jetë kryeministër me legjitimitet popullor më të fortë dhe figurë më të pastër se gjithë kryeministrat e pasluftës.
Këtë kapital të madh politik ai do ta vërë në funksion të zgjidhjes së problemeve të mëdha të Kosovës. Problemet si mosnjohja prej Serbisë, korrupsioni i brendshëm, ngecja e zhvillimit ekonomik, mund të gjejnë zgjidhje pozitive, vetëm me një kryeministër kaq të votuar dhe kaq të pastër si Albin Kurti.
