Zahir Pajaziti dhe dy shokët e ngushtë të tij, Hakif Zejnullahu e Edmond Hoxha, u vranë më 31 janar 1997 në Pestovë të Vushtrrisë, pasi u zunë në pritë nga policia serbe.
Lajmin për rënien e tyre, familja Pajaziti e mori vesh tek të nesërmen, nga vëllai i Hakif Zejnullahut, Sabedini.
Këtë rrëfeu vëllai i Zahirit, Bajram Pajaziti.
Ai tha se më së rëndi e pati t’ia kumtojë lajmin babait që ishte plakur. Ky i fundit e kishte pritur shumë rëndë lajmin për vdekjen e të birit.
Bajrami rrëfeu se ditën kur u vra Zahiri, ai kishte qenë agjërueshëm, pasi atë kohë kishte qëlluar muaji i Ramazanit.
Tash, familja Pajaziti është shtuar edhe më shumë e kujtimi për heroin e kombit është rritur.
Më të vegjlit kanë mësuar shumë poezi për Zahir Pajazitin me shokë që dhanë jetën për liri.
