Profesori Muhamet Hamiti ka komentuar mbi deklaratën e kryetarit të AAK-së, Ramush Haradinaj për bashkimin me Shqipërinë.
Sipas tij, me këtë deklaratë për bashkim të Kosovës me Shqipërinë po i lëkundin themelet e shtetit të pavarur të Kosovës tash, gati 13 vjet mbas shpalljes së pavarësisë dhe të njohjes ndërkombëtare nga më shumë se 100 shtete.
Shkrimi në Facebook:
A janë të vetëdijshëm këta që – për oportunizëm, në stinë elektorale - po flasin për bashkim të Kosovës me Shqipërinë se po i lëkundin themelet e shtetit të pavarur të Kosovës tash, gati 13 vjet mbas shpalljes së pavarësisë dhe të njohjes ndërkombëtare nga më shumë se 100 shtete?
As populli i Kosovës as protagonistët kryesorë politikë shqiptarë të Kosovës, të prirë nga Presidenti Rugova, nuk janë lëkundur kurrë nga ky projekt i shtetit të pavarur të Kosovës – që atëherë ishte ideal e tash është realitet - as në kohën e luftës gjenocidale të Serbisë kundër shqiptarëve e Kosovës.
Populli i Kosovës, shtetasit e vendit tonë, e kanë rastin që më 14 shkurt ta konfirmojnë dashurinë për Republikën tonë duke ndëshkuar me votë këta oportunistë të paskrupullt.
