Xhelal Sveçla nga Lëvizja Vetëvendosje, ka thënë se shokët e Richard Grenellit dhe mbështetësit e ish-presidentit Donald Trump, po mburren me presidentin Joe Biden.
Ai teksa i është kundërpërgjigjur kryeministrit në detyrë Avdullah Hotit, ka thënë se ai dikur e qortonte Albin Kurtin pse e mbështeste Bidenin, përcjell Bota sot.
Sipas tij, Biden i ka kërkuar reciprocitet presidentit serb Aleksandar Vuçiq, e reciprocitetin “shokët e Grenellit” e larguan mes pandemisë.
Sveçla i ka quajtur të pafytyrë dhe të dobët.
Postimi i plotë i Sveçlës në Facebook:
Çka s’po shohim. Shokët e Grenellit e mbështetësit e Trumpit, po mburren me presidentin Biden.
Janë shumë të dobët, por dobësia e tyre nuk duhet të bëhet dobësi e Kosovës.
Kur Albin Kurti e mbështeti presidentin Biden haptazi në fushatë, e bëri sepse e dinte qëndrimin e Joe Biden në mbështetje të Kosovës.
Ndërsa këta që “ua ka bërë Zoti verë e raki” na qortonin se pse e mbështetëm Bidenin.
Kjo që Biden i ka kërkuar Vuçiqit, - mutual recognition - i bie njohje e ndërsjellë, pra reciprocitet. Ndërsa këta shokët e Grenellit, për me largu reciprocitetin e rrëzuan qeverinë në mes të pandemisë.
Janë shumë të pafytyrë, por pafytyrësia e tyre nuk do të qeverisë më me Kosovën.
Presidenti Biden do ta ketë partnerin legjitim dhe të denjë për bashkëpunim në Kosovë, Albin Kurtin.
