Më 24 mars të vitit 1999, filluan bombardimet ajrore të NATO-s, të cilat do të zgjasnin 78 ditë, por që në fund do të detyronin Sllobodan Millosheviçin të nënshkruante kapitullimin e Jugosllavisë në Kumanovë të Maqedonisë së Veriut.
E aleanca më e madhe ushtarake në histori, përveç raketave nga ajri, shpërndante edhe fletushka nëpërmjet të cilave paralajmëronte ushtarët e ushtrisë së Jugosllavisë se ishin target i bombardimeve.
Në një fletushkë, NATO u thotë ushtarëve serb se nëse qëndrojnë në Kosovë do të përballen me vdekjen.
“Mund të fshiheni, por forcat e NATO-s ende ju shohin. Qëndroni në Kosovë dhe përballuni me vdekjen e sigurt ose lëreni njësinë tuaj dhe pajisjet e juaja dhe largohuni nga Kosova tani”, thuhet në fletushkën e NATO-s drejtuar ushtarëve serb.
Tutje në fletushkë u kërkohej ushtarëve serb të pushojnë së ndjekuri urdhërat e Millosheviçit për të kryer gjenocid dhe të tjera mizori kundër civilëve në Kosovë.
“Nëse zgjidhni të qëndroni, forcat e NATO-s do t’iu bombardojnë juve pa pushim, me shumë sisteme të ndryshme të armëve nga vende të ndryshme, nga toka, nga deti dhe nga ajri”, thuhet në fletushkën e NATO-s.
“Ju jeni përgjegjës për veprimet e juaja dhe në fund të fundit do të mbaheni përgjegjës. Zgjidhja është e juaja”, thuhej tutje.
