Bashkësia Lokale e Karaçevës i ka dërguar një letër të hapur kryeministrit Albin Kurti, kryeparlamentarit Glauk Konjufca dhe ministres së arsimit, Arbërie Nagavci.
Në letrën dërguar gazetës “Bota sot”, ata kanë treguar për problemet që kanë në atë pjesë, derisa çdo ditë përballen me hyrjen e forcave të xhandarmërisë serbe paramilitare.
Përpos kësaj, problemi tjetër është mbyllja e 15 shkollave në brezin kufitar në Karaçevë, me mbi 100 nxënës.
Bashkësia Lokale e Karaçevës ka kërkuar që të hapen këto shkolla që janë mbyllur, derisa dhe iu ka bërë ftesë krerëve të shtetit që ta vizitojnë brezin kufitar.
Më poshtë letrat:
Po iu drejtohemi Kryeministrit dhe Kryeparlamentarit.
Letër e hapur nga Bashkësia Lokale e fshatit Karaçevë e poshtme K.Kamenicë.
Të nderuara mediume të shkruara dhe elektronike me padurim e presim themelimin e Qeverisë së re Kurti 2 Ne banorët e brezit kufitar po iu njoftojmë përmes këtij shkrimi si Bashkësi Lokale, se banorët e brezit kufitar jemi të zhgënjyer tej mase me problemet të cilat ballafaqohemi çdo ditë, çdo muaj, çdo vit me hyrjen e forcave të xhandarmërisë serbe paramilitare etj. Ky problem është shfaqur tek ne që nga viti 2001 dhe ende vazhdon.
Është i vetmi problem që ballafaqohemi qe 20 vite të plota duke protestuar shumë herë, duke njoftuar të gjitha qeveritë që kanë qenë por askush nuk na mori parasysh. Por as Kuvendi e as Kryetarët e Parlamentit nuk janë marrë asnjëherë me këtë problem. Vetëm ne banorët kemi qenë të zëshëm për ruajtjen e sovranitetit, integritetit territorial të Republikës së Kosovës në këtë brez kufitar që vazhdimisht jemi të rrezikuar nga shteti okupues-Serbia. Edhe pse vazhdimisht kemi kërkuar nga institucionet, Presidenti, Kryeparlamentari dhe Kryeministri por nuk janë marrë fare me këtë problem të banorëve. Presim nga Qeveria e Kurtit që urgjentisht të merret me këtë pjesë të brezit kufitar-Karaçevës.
Problemi numër 2 që i adresohet Qeverisë është mbyllja e 15 shkollave, në mesin e 15 shkollave është edhe shkolla e brezit kufitar në Karaçevë që numëron mbi 100 nxënës. Tani po i numëroj mbi 15 shkolla që i ka mbyllur dhe ia ka vënë drynin: 1."Sh.f."Asllan Thaçi"-Karaçevë e Poshtme. 2."Sh.f. - Busavatë 3."Sh.f. - Petroc 4."Sh.f. - Shipashnicë e Poshtme 5."Sh.f. - Kopërnicë 6."Sh.f. - Tugjevc 7."Sh.f. - Sfircë 8."Sh.f. - Strezoc 9."Sh.f. - Krilevë 10."Sh.f. - Desivojcë 11."Sh.f. - Lisockë 12."Sh.f. - Dajkoc 13."Sh.f. - Poliçkë 14."Sh.f. - Dazhnicë 15."Sh.f. - Velegllavë 16."Sh.f. - Kranidell Etj. Me këto reforma që ka marrë kreu I Komunës Qëndron Kastrati me mbylljen e shkollave, të marrin dhe t'i shpërndajnë nxënësit në lokalitetet e tjera ku gjitha shkollat në këtë komunë i plotësojnë të gjitha kriteret për mbarëvajtjen e mësimit ku edhe personeli arsimor i ka plotësuar gjitha kushtet. Të nderuara Institucione të Kosovës, Kryeministri Z.Kurti, Kryeparlamentari Z.Konjufca dhe Ministrit të Arsimit dhe gjithë delegatëve të Kuvendit, ngriteni zërin për hapjen e këtyre shkollave dhe t'ia rikthejmë buzëqeshjen tërë Komunës dhe mbi 548 nxënësve që nuk vijojnë mësimin. Mbyllja e këtyre shkollave është antikombëtar, antiligjor, joshqiptar ky gjest famëkeq që na ka ndodhur neve. A ka më keq se sa të privohet e drejta e nxënësit për t'u shkolluar në lokalitetet e tyre? Në këtë pjesë të Kamenicës kërkojmë që nxënësit të mos privohen nga e drejta e shkollimit dhe ne kërkojmë që janë të garantuara shkollat fillore me ligj dhe me kushtetutë. Kthehuni kah problemet e Karaçevës dhe t’i merrni seriozisht këto probleme, që t'i hapni shkollat. Dhe duam që të kërkoni nga kreu i Kamenicës , Qëndron Kastrati që ta merrni vendimin e prerë dhe ta urdhëroni për hapjen e shkollave. I nderuar Kryeministër Kurti, Qëndron Kastrati është zgjedhur nga partia juaj si kryetar I Komunës sonë. Ne nuk do lëmë gur pa lëviz deri në realizimin e këtyre kërkesave. Vazhdimisht do ua kërkojmë këto kërkesa. Ne iu ftojmë që të dilni edhe ju në brezin kufitar-Karaçevë dhe t'i shihni problemet tona. Shpresa jonë e vetme tek ne jeni ju ! Duam që kjo kërkesë të na kthehet pozitivisht. Me respekt: Bashkësia Lokale-Karaçevë e Poshtme Kryetar i Bashkësisë Lokale: Selver Lenjani.
