Kryeministri i Kosovës, Albin Kurti sot është nisur për në Bruksel ku do të ketë takime me përfaqësuesit e BE-së.
Para se të niset Kurti ka zhvilluar një takim me diplomatin amerikan Matthew Palmer lidhur me dialogun Kosovë-Serbi.
Këtë e ka konfirmuar ambasadori i SHBA-së në Kosovë, Philip Kosnett përmes një postimi në Twitter ku tha se dialogu është thelbësor për integrimin Euro-Atlantik të Kosovës.
“Procesi i dialogut i udhëhequr nga BE mbetet thelbësor për suksesin ekonomik të Kosovës dhe integrimin Euro-Atlantik”, ka thënë ai.
Kurti do të takohet me presidentin e Parlamentit Evropian, David Sassoli dhe presidenten e Komisionit Evropian, Ursula von der Leyen. Gjithashtu do të takohet edhe me shefin e diplomacisë evropiane, Josep Borrell.
Për takimin Kurti Pallmer, ka reaguar ish-kandidati për deputet i LVV-së, Liri Loshi.
Ai thotë se Kurti u konsultua me Amerikën para nisjes për Bruksel.
Sipas tij, Kurti i zhgënjeu rrencat në Kosovë.
“A nuk qenka anti-amerikan Albini. Si ore? LDK-ja, thoshte. PDK-ja thoshte. Grenelli thoshte... Ky tash t’u u konsultu me Amerikën para se të udhëtojë për Bruksel. Zhgënjim i madh... Për rrencat!”, ka shkruar ai në Facebook.
