Ministri i Shëndetësisë, Arben Vitia, tha sot në debatin mbi gjendjen e pandemisë në Kosovë, se pritjet e deputetëve të opozitës nga pozita janë më të mëdha sesa ajo që qytetarët presin nga ai.
Duke iu përgjigjur deputetit të PDK-së Hajdar Beqa, ministri Vitia tha se ka shumë probleme me korrupsionin dhe nepotizmin, si dhe probleme të tjera për shkak të keq-menaxhimit 20-vjeçar në sektorin e shëndetësisë, por u zotua se të gjitha këto probleme Qeveria Kurti do t’i zgjidhë gjatë mandatit të saj.
Vitia: Pritjet tuaja janë shumë më të mëdha se të qytetarëve
“Kemi edhe shumë probleme në të gjitha anët e sektorit shëndetësor për shkak të keq menaxhimit 20-vjeçar, i cili iu ka bërë këtij sektori. Mirëpo, një çka nuk pajtohem, ne nuk i kemi mashtruar qytetarët, qytetarët e kanë pa këtë gjë prandaj e kanë bërë ndryshimin. Në anën tjetër, besomëni pritjet e juaja janë shumë më të mëdha sesa të qytetarëve. A unë ju garantoj që për katër vjet do të zgjidhen të gjitha këto probleme që janë shkaktuar nga shumica që ju i dini këtu për këto 20 vjetët e fundit. Këto probleme do t’i zgjedhim, por jo për 30 ditë. Për 30 ditë do ta zgjedhim problemin e vetëm që është duke na shqetësuar në MSH dhe Qeveri - do të sigurojmë vaksinën dhe kjo është ajo çka do ta bëjmë, ndërsa për problemet tjera të jeni të sigurt se do t’i zgjedhim”, tha ai.
