Në një konferencë për medie, Lidhja Demokratike e Kosovës tha se Programi i Qeverisë nuk e paraqet kornizën e parimeve në dialogun me Serbinë.
Nënkryetarja e LDK-së dhe njëherësh koordinatorja e departamentit për politikë të Jashtme, Shqipe Mjekiqi, tha se Programi i Qeverisë së re nuk ka as strategji e as plan të njohjes.
E pyetur nëse Lëvizja Vetëvendosje ka hequr dorë nga parimet e dialogut me Serbinë sa i kishte gjatë kohës në opozitë, Mjekiqi tha se kjo parti ka ndryshuar qëndrim ndaj shumë çështjeve me ardhjen në pushtet.
“Ka ndryshuar kurs sa ishte në opozitë jo vetëm sa i përket dialogut por edhe ne shumë çështje të tjera”, tha Mjekiqi.
“LDK-ja e konsideron të rëndësisë të jashtëzakonshme konsolidimin e politikës së jashtme të Kosovës. Përfaqësimi i interesave të qytetarëve të Kosovës duhet të jetë prioritet për secilen qeveri, por programi i Qeverisë për politikën e jashtme është i natyrës dëshirore. Me një fjalë, s’ka strategji, s’ka plan veprimi. Programi nuk përmban asnjë fjalë për anëtarësimin e Kosovës në Këshillin e Evropës, Interpol e të tjera. Qeveria ka mungesë të strategjisë për njohje të reja. Qeveria nuk e shpjegon se si do të arrihen fondet e IFA-së. Nuk ka strategji as për anëtarësimin në Bashkimin Evropian. Ne e konsiderojmë që procesi i heqjes së vizave për qytetarët e Kosovës është i vonuar. Bashkëpunimi me Shqipërinë përmendet në vetëm një paragraf, ndryshe nga premtimet gjatë zgjedhjeve të cilat nuk po konkretizohen”, ka thënë Mjekiqi.
