Kryetari i PDK-së, Enver Hoxhaj, ka zyrtarizuar Agim Aliun, kandidat për zgjedhjet e reja lokale për Komunën e Ferizajt.
Hoxhaj shkruan se ai dhe Partia Demokratike e Kosovës janë krenarë me Agim Aliun.
“Agim Aliu e ka mbështetjen e plotë timen dhe të Partisë Demokratike të Kosovës që të vazhdojë punën e mirë në të mirë të Ferizajt dhe banorëve të tij. Ferizaj është mirë dhe i sigurt vetëm me Agimin në krye, e kjo nuk ka pse të ndryshojë”, shkruan ai në Facebook.
Ja shkrimi i tij:
Unë dhe Partia Demokratike e Kosovës jemi krenarë me Agim Aliun. Një kryetar model, që për katër vite ka dhënë shembull pas shembulli si punohet me vizion e guxim, kur dashuria për qytetin është e madhe e interesi i qytetarëve vihet në radhë të parë.
Askush, asnjëherë, nuk e ka trajtuar Ferizajn më mirë se Agim Aliu. Idetë e tij për një qytet të bashkuar, me infrastrukturë moderne, kushte ideale për biznes e banim për secilin, sot janë jetësuar falë punës të jashtëzakonshme që ai ka bërë gjatë këtij mandati.
Prandaj, Agim Aliu e ka mbështetjen e plotë timen dhe të Partisë Demokratike të Kosovës që të vazhdojë punën e mirë në të mirë të Ferizajt dhe banorëve të tij. Ferizaj është mirë dhe i sigurt vetëm me Agimin në krye, e kjo nuk ka pse të ndryshojë.
Të priftë e mbara, Agim. Faleminderit për punën e përkushtimin.
