Anëtari i PSD-së Shkodran Hoti, dje ka propozuar që Glauk Konjufca të bëhet kryetar i Lëvizjes Vetëvendosje.
“E kam të qartë se Memli nuk është zgjidhja e duhur sipas partive të tjera, por për PDK'në po. Ashtu siç bëri mirë LDK me Lumirin, edhe PDK ka goditë në pikë me Memlin. Tash mbetet veç edhe VV me e vendos në krye Glaukun dhe fillon me u normalizu skena politike”, ka shkruar Shkodran Hoti në një postim në Facebook.
Por, në LVV janë kundërpërgjigjur, duke thënë se kjo parti e ka liderin e saj, përcjell Bota sot. Driton Tali, ish-këshilltar i kryeministrit Albin Kurti, ka thënë se VV-ja e ka liderin më të mirë jo vetëm në partitë vendore, por edhe në ato të rajonit dhe më gjerë.
Ai ka thënë se tani VV-ja ka prioritet jetësimin e programit qeverisës, ndërsa do të veprojnë sipas procedurave kur të vije koha e zgjedhjeve të brendshme në këtë parti.
Reagimi i Talit në Facebook:
Vetëvendosje e ka liderin e saj!
Po i lexojë disa "dashamirë" të LV'së që po e propozojnë Glaukun për kryetar të LV'së, në kontekst të ndryshimeve të lidershipit që bënë LDK dhe PDK.
Si mik dhe këshilltar i të dyve (në "Qeverinë Kurti 1" i Albinit e në "Qeverinë Kurti 2" i Glaukut) më duhet ta marr si kompliment këtë propozim (besoj edhe kolegët e mi në kabinetin e Kryetarit të Kuvendit ashtu ndihen).
Si mik i Glaukut, të cilin e njoh tash e shumë vite, them se Ai është një patriot që e do fort Kosovën dhe shqiptarinë në përgjithësi, intelektual "par excellencë", shok shembullor dhe qytetar shumë i ndershëm.
Por LV'ja e ka liderin e saj!
Bile liderin me të mirin jo vetëm ndër partitë shqiptare ekzistuese, por edhe ato të rajonit dhe më gjerë!!!
Prandaj, ne LV'ja, si organizatë e cila nuk e ka problemin e lidershipit dhe e cila më 14 shkurt e fitoi bindshëm besimin e qytetarëve (me 50.25%) për ta qeverisur Kosovën, tashti jemi të përkushtuar, me tërë energjinë, që ta jetësojmë programin tonë zgjedhor, për ta bërë Kosovën shtet ku jetohet mirë për të gjithë qytetarët e saj (pa marrë parasysh afinitetin e tyre).
E kur të vjen koha e zgjedhjeve të brendshme atëherë ne në transparencë të plotë (si gjithmonë deri tashti), do të veprojmë sipas statutit dhe procedurave.
