Ish-kryetari i Gjilanit nga radhët e PDK-së dhe kryetar i degës së kësaj partie në këtë komunë, Qemajl Mustafa, ka dhënë dorëheqje nga kjo parti disa ditë më parë.
Mustafa ka thënë se dorëheqja e tij erdhi si shenjë respekti ndaj strukturës e sidomos ndaj anëtarësisë së PDK-së në Gjilan.
”U pa që unë nuk isha profili që mundet me e ndreqë atë degë. Qendra ishte shume e pakujdesshme ndaj nesh dhe unë e lirova hapësirën për gjeneratën e mesme që është e mirë nëse duan me u bashku. Hoqa dorë edhe për hir të respektit ndaj fitoreve tona të mira në të kaluarën. Unë thjesht shkova për t’ju ndihmuar dhe ta rikthejë atë degë por në ndërkohë u pa që as nuk ka interesim qendra e as dega për ta rregulluar punën me Gjilanin dhe me Anamoravën. Besoj shumë në gjeneratën e mesme dhe në rininë e Gjilanit e të PDK-së. Ata e rregullojnë trendin në Gjilan patjetër”, kishte deklaruar Mustafa.
E pas dorëheqjes së Mustafës nga PDK-ja, po paralajmërohen edhe dorëheqje të tjera.
Analisti politik, Faton Mehmeti, thotë se dorëheqja e Mustafës është fillimi i shkapërderdhjes së PDK-së.
Ai shton se, pritet që në ditët në vijim të jap dorëheqje edhe Lirak Çelaj.
“Largimi i Qemajl Mustafës nga PDK është fillimi i shkapërderdhjes së kësaj partie. Këtë gjë e kemi thënë para disa ditësh. Ditëve në vijim me gjasë edhe Lirak Çelaj do të largohet, dhe të tjerët pas tij..!!!”, ka shkruar Mehmeti në Facebook.
