Pas aksidentit tragjik që ndodhi në Kroaci në mëngjesin e së dielës ku u përshi autobusi nga Kosova e që dyshohet për vdekjen e dhjetë personave, Presidentja e Kosovës, Vjosa Osmani tashmë ka kontaktuar me Ambasadën e Kosovës në Zagreb dhe autoritetet kroate.
Ajo shkruan se me zemër e me shpirt janë me familjet që humbën më të dashurit e tyre në këtë tragjedi.
“Lajm tragjik e i rëndë sot për vendin tonë. Nga kontakti me Ambasadën e Kosovës në Zagreb dhe me autoritetet kroate, jam njoftuar se nga një aksident komunikacioni që ndodhi në Slavonski Brod të Kroacisë, kanë humbur jetën tragjikisht dhjetë udhëtarë e shumë të tjerë janë lënduar. Me zemër e me shpirt sot jemi me familjet që humbën më të dashurit në këtë tragjedi. Dhimbja është e papërshkrueshme e humbja shumë e madhe. Ngushëllime të sinqerta për të gjithë!”, ka shkruar Osmani.
Osmani thotë edhe se shteti i Kosovës do të jetë në krah të familjarëve që humben jetën sikurse edhe të të lënduarve.
“Shteti i Kosovës do të jetë në krah të familjeve të atyre që humbën jetën, sikurse edhe të të lënduarve, të cilëve ju dëshiroj shërim të shpejtë. Veprimet tona shtetërore do të jenë në funksion të lehtësimit të dhimbjes së familjeve që humbën më të dashurit e tyre, ndaj zyrtarë të institucioneve të Kosovës tashmë janë nisur për në Kroaci për t`u dalë në ndihmë qytetarëve tanë të përfshirë në këtë aksident tragjik”, ka shkruar ndër tjera Osmani.
