Kryeprokurori i Ferizajt Shukri Jashari, në një konferencë për media ka dhënë detaje në lidhje me rastin e vrasjes së vajzës 18 vjeçare me inicialet M.O.
Jashari tha se i dyshuari kryesor në këtë rast D.K i cili është aktualisht në arrati ka qenë i akuzuar edhe më herët për vrasje.
Ai theksoi se edhe personi i arrestuar ka një aktakuzë për tentim-vrasje.
“Sa i përket personit me incialet D.K, ky është i njohur edhe për policinë dhe prokurorinë. Ai i ka një numër jashtëzakonisht të madh të rasteve, mirëpo të gjitha rastet i ka të mbyllura. Ka qenë i dyshuar dhe i akuzuar edhe për vrasje mirëpo edhe për raste të natyrave të ndryshme penale”.
“Ndërsa sa i përket personit të dytë. Është e vërtetë se edhe personi i dytë me incialet A.S, është ngritur një aktakuzë qysh në vitin 2013. Akoma nuk është mbajtur shqyrtimi i kësaj vepre penale. Shqyrtimi pritet të mbahet në muajin shtator të këtij viti”.
Kryeprokurori i Ferizajt u pyet se a kishte informacione organi i akuzës së viktima po bashkëjetonte me forcë me të dyshuarin kryesor.
Ai tha se nuk ka informacione se vajza po bashkëjetonte me forcë.
“Këtë fakt ju që po e potenconi nuk kemi pasur të paraqitur ndonjë rast që ajo ka qenë duke bashkëjetuar me forcë”.
Shukri Jashari tha se akoma nuk dihen shkaqet e vdekjes së 18 vjeçares.
” Nuk dihen shkaqet e vdekjes. Është bërë raporti i autopsisë dhe ne nuk e kemi pranuar akoma për të përcaktuar se cili ishte shkaku i vdekjes”.
