Në kushte normale sot do të kishte nisur viti i ri shkollor, por për shkak të numrit të madh të infektimeve me COVID-19, ministria e arsimit ka marr vendim për shtyrje e mësimit deri më 13 shtator.
Për këtë ka reaguar deputetja e LDK, Hykmete Bajrami, e cila i është drejtuar kryeministrit Albin Kurti që të bëjnë një zgjidhje për hapjen e shkollave.
“Deri tash s’kam parë një rrugë të qartë, një strategji ose dokument të Ministrisë së Arsimit për hapjen e shkollave. Kryeministër bëni zgjidhje”, ka shkruar ajo në Facebook.
Postimi në Facebook:
Kryeministër bëni zgjidhje për hapjen shkollave
Sot, si në kohë lufte, shkollat janë të mbyllura. Kjo nuk është zgjidhje. Sot do të duhej të uronim fillimin e vitit të ri shkollor. Sikurse po ndodh në vendet e rajonit. Kur erdhi pandemia, më 11 mars 2020 u mbyllën shkollat por pas një jave filloi mësimi online.
Kryeministër, duhet të bëni zgjidhje, e di që jeni i zënë edhe me punë tjera, edhe më angazhime e punësime partiake, edhe me fushatën elektorale, por po kërkoj nga ju dhe secili anëtar i kabinetit qeveritar të fokusoheni në gjetjen e një zgjidhje për hapjen e shkollave.
Deri tash s’kam parë një rrugë të qartë, një strategji ose dokument të Ministrisë së Arsimit për hapjen e shkollave.
Kryeministër bëni zgjidhje. Ka kohë për fushatë elektorale. Ka kohë për sulme politike.
Qytetarët ju votuan për të bërë zgjidhje dhe fjala është e Juaja.
