Mbi 307 mijë qytetarë të Kosovës janë vaksinuar me të dy dozat e vaksinave anti-COVID deri tash, bëhet e ditur në uebfaqen për statistika të Ministrisë së Shëndetësisë.
Sipas njoftimit aty, në nivel vendi, që nga fillimi i procesit të vaksinimit, janë administruar mbi 923 mijë vaksina.
Pos 307 mijë e 467 qytetarëve që i kanë marrë të dyja dozat, 308 mijë qytetarë të tjerë kanë marrë dozën e parë.
Në vend ndahen vaksinat “AstraZeneca” dhe “Pfizer”. Vetëm të shtunën janë administruar mbi 19 mijë e 500 doza.
Javën e ardhshme pritet arritja e rreth 500 mijë vaksinave nga Shtetet e Bashkuara të Amerikës, ndërsa nga 12 shtatori vaksinim do të ketë edhe ditëve të diela.
Përqindja e ulët e qytetarëve të vaksinuar ka alarmuar stafin shëndetësor që ditëve të fundit është përballur me numër të shtuar të pacientëve në gjendje të rëndë. 93 për qind e rreth 1200 pacientëve në spitalet dhe klinikat e Kosovës, janë të pavaksinuar.
Vetëm sot, jetën e humbën 21 qytetarë si pasojë e COVID-19.
