(E plotësuar 14-45) - Më 7 tetor 2021 pritet të hapet procesi i rregullt gjyqësor ndaj Hysni Gucatit dhe Nasim Haradinajt i cili do të nisë me deklaratën hapëse të prokurorisë.
I gjithë procesi parashihet të përfundojë në fund të dhjetorit të këtij viti, është thënë në konferencën e sotme përgatitore për gjykim të mbajtur nga Dhomat e Specializuara në Hagë.
Trupi gjykues në rastin e ish-krerëve të Organizatës së Veteranëve të Luftës së UÇK-së, ka miratuar sot kërkesën e prokurorisë për t’i shtuar listës edhe një dëshmitar.
Përveç kësaj, ndër urdhrat që i ka lëshuar gjyqtari, ishte edhe përcaktimi i datës së fillimit të procesit të rregullt gjyqësor derisa po synohet që çështja tërësisht të përfundojë më 17 dhjetor.
Kryetari i trupit gjykues Charles L. Smith ka deklaruar se ZPS mund të thërrasë tre dëshmitarë për paraqitjen e çështjes së saj.
Smith: Trupi gjykues pranon kërkesën e ZPS-së për të shtuar edhe një dëshmitar
“Urdhri i parë, pasi janë shqyrtuar argumentet e ngritura nga secila prej palëve dhe sa i takon në veçanti kërkesës së ZPS-së për të shtuar një dëshmitar të ri në listën e dëshmitarëve, trupi gjykues e pranon këtë kërkesë, po ashtu neve do të marrim parasysh edhe parashtrimet nga ZPS, si rezultat i rregullit 118/1A paneli vendos që ZPS mund të thërrasë tre dëshmitarë për paraqitjen e çështjes së saj, përkatësisht dëshmitarin 48-41, 48-42 dhe 48-66. Trupi gjykues e urdhëron më tej ZPS-në që të thërrasë dëshmitarin 48-66 si dëshmitarin e fundit në mënyrë që t’i lejojë kohë të mjaftueshëm mbrojtjes për të marrë në kundërpyetje këtë dëshmitar. ZPS duhet të dorëzojë deri më 1 tetor 2021 listën e dëshmitarëve sipas urdhrit në të cilën ata do të merren në pyetje prej prokurorisë”, ka thënë kryetari i trupit gjykues.
Pasi ka dëgjuar palët, trupi gjykues ka përcaktuar 7 tetorin si datë për hapjen e procesit gjyqësor, ku ZPS do të lexojë të gjithë aktakuzën në versionin e redaktuar.
Smith: Çështja ndaj Gucatit e Haradinajt hapet më 7 tetor 2021
“Trupi gjykues përcakton datën për hapjen e çështjes më datë 7 tetor 2021. Më tej në pajtim me rregullin 124/2 dhe parashtrimet e mbrojtjes sa i takon hapjes së çështjes ZPS do të lexojë aktakuzën versionin e korrigjuar siç është depozituar më 5 korrik 2021. ZPS do të jep deklaratën hapëse më 7 tetor dhe do të përpiqet të përfundojë deklaratën e tillë brenda kësaj date”, ka thënë Smith.
Mbrojtja ka kërkuar që aktakuza të lexohet tërësisht në publik, meqë siç kanë theksuar ata, gjyqi është publik dhe aktakuza në tërësi paraqet pretendimet si ZPS i shkruan ato.
Ndërsa prokuroria ka deklaruar që parashikojnë dy deri në tre seanca për fjalinë e tyre hapëse me rreth katër korë material audio-viziv.
Kryetari i trupit gjykues ka urdhëruar Zyrën e Prokurorit të Specializuar që t’i jep mbrojtjen listën e provave materiale brenda 24 orëve para hapjes së çështjes, përfshirë këtu edhe video të cilat planifikohen të përdoren si prova materiale prej ZPS-së.
Sipas trupit gjykues, prezantimi i ZPS-së duhet të përfundojë më 18 tetor 2021.
Në seancën e sotme u tha se ZPS duhet të përfundojë marrjen në pyetje të dëshmitarëve të saj brenda katër seancave.
Ndërsa për kohën e kundër-pyetjeve nga ana e mbrojtjes, trupi gjykues nuk ka përcaktuar një afat, veçse kryetari i trupit gjykues ka deklaruar se do të ndërhyjnë në kohë nëse është e nevojshme.
Smith: Çështja ndaj Gucatit e Haradinaj synohet të përfundojë më 17 dhjetor
“Trupi gjykues përcakton si datën e synuar për mbylljen e çështjes së ZPS-së datën 9 nëntor 2021. Ne, po ashtu, përcaktojmë si datën e synuar për mbylljen e të gjithë çështjes datën 17 dhjetor 2021. Këto dy data mund të ndryshohen në varësi të zhvillimit të procedurave”, ka thënë kryetari i trupit gjykues.
Ndër të tjera, Smith ka urdhëruar palët të diskutojnë çështje që janë të bëjnë me klasifikimin e provave materiale sa i takon kërkesës për prova të drejtpërdrejta për trupin gjykues.
Deri më 20 shtator, palët duhet të informojnë trupin gjykues për marrëveshjet e tyre dhe çështjet që nuk kanë arritur t’i zgjidhin.
***
Prokurori i Zyrës së Specializuar ka prezantuar para trupit gjykues pjesë të aktakuzës për Nasim Haradinajn dhe Hysni Gucatit.
Në pyetjen e gjykatësit ai tha se është një listë për përshkrim të sjelljes së të akuzuarve për të cilët ngritet aktakuzë.
“Kjo pyetje do të marrë përgjigje nga unë në lidhje me atë që thuhet në aktakuzë. ZPS pretendon se ajo që kanë bërë të akuzuarit është që kanë shpërndarë informacion konfidencial, kanë deklaruar se qëllimi i tyre për të shpërndarë këtë informacion është që të pengonin procedurën dhe kanë nxitur edhe publikun që e kanë pasë në zotërim apo kanë pasë qasje në informacion të shpërndajnë më tej dhe ta publikojnë këtë informacion, pastaj në përmbajtjen e paketës – pjesë të tyre janë shpërndarë – pra sa i takon pengimit specifik ne kemi ngritur pretendimin në tri pjesë: dëshmitarët janë frikësuar nga ajo që kanë bërë të akuzuarit, aftësia e ZPS për të proceduar penalisht këto krime u rrezikua dhe burimet e ZPS u devijuan”.
Sot seanca përgatitore për gjykimin e Gucatit dhe Haradinajt
Në ora 09:30 do të nis seanca e radhës përgatitore për gjykim në rastin e ish-krerëve të Organizatës së Veteranëve të Luftës, Hysni Gucati dhe Nasim Haradinaj.
Konferenca përgatitore për gjykimin është e rregulluar me rregullën 117 të Rregullores së Procedurës dhe Provave të Dhomave të Specializuara të Kosovës.
Hysni Gucati, së bashku me Nasim Haradinajn, po akuzohen për vepra penale kundër administrimit të drejtësisë, konkretisht për pengim të personave zyrtarë në kryerjen e detyrave zyrtare, për frikësim të dëshmitarëve, për hakmarrje dhe për shkelje të fshehtësisë së procedurës, raporton “Betimi për Drejtësi”.
“Akuzat e paraqitura në aktakuzën e konfirmuar mbështeten në dyshimin e bazuar mirë se së paku midis 7 dhe 25 shtatorit 2020, z. Gucati dhe z. Haradinaj zbuluan pa autorizim informacion të mbrojtur prej Ligjit të Dhomave të Specializuara, ndër të cilat të dhëna identifikuese të disa dëshmitarëve (të mundshëm), në tre konferenca shtypi dhe aktivitete të tjera të transmetuara, si edhe përmes shpërndarjes së mëtejshme ku përfshihen deklaratat në rrjetet sociale”, thuhej në njoftimin e Dhomave të Specializuara.
Gucati dhe Haradinaj ngarkohen se kanë bërë komente nënçmuese kundër dëshmitarëve të mundshëm dhe në mënyrë të përsëritur shprehen synimin e tyre për të dëmtuar punën e Dhomave të Specializuara.
“Me këto veprime, z. Gucati dhe z. Haradinaj shkelën fshehtësinë e procedurës dhe frikësuan dëshmitarë (të mundshëm) të Zyrës së Prokurorit të Specializuar dhe si pasojë penguan punën dhe hetimet e ZPS-së”, thuhej në njoftimin e Dhomave të Specializuara të Kosovës.
