“Gjatë takimit trilateral, pala serbe ka deklaruar se janë dakord që të hapen të gjitha arkivat, sipas tyre nënkupton edhe arkivat shtetërore të Kosovës që kanë të bëjnë me UÇK-në. Unë mendoj që kjo është në interes tonë sepse shumica e varrezave masive ku pretendohet se janë pjesët e mbetura të mbi 1600 qytetarëve ndodhen në këto varreza për të cilat kanë informata kryesisht arkivat ushtarake të Serbisë“.
Kjo deklaratë e zëvendëskryeministrit të Republikës së Kosovës, Besnik Bislimi, se janë dakorduar me palën serbe për hapjen e arkivave shtetërore, ka nxitur reagime të shumta në Kosovë.
Përmes një postimi në facebook, ka reaguar edhe Visar Berisha, ish këshilltar i Avdullah Hotit, gjatë kohës sa ishte kryeministër.
Ai e quan këtë gabim të qeverisë Kurti.
“Keni gabuar! Ka kohë që Beogradi ka kërkuar nga pala kosovare që të hapen të ashtuqujtunat arkiva te UÇK-së. Kjo ka ardhur si përgjigje refuzuese ndaj kërkesës tonë për hapjen e arkivave të Shërbimit të Sigurimit Publik të Serbisë, Shërbimit ushtarak serb dhe shërbimeve tjera, të cilat Kosova i mbanë përgjegjëse për krimet serbe në Kosovë”, shkruan Berisha, përcjellë “Bota sot”.
“Serbia kërkon arkivat e UÇK-së për të barazuar krimin e saj me krimet imagjinare, jo pse i duhet e vërteta! Qeveria jone ka gabuar! Asnjë arkivë nuk do të mund të hapet. Veç sa keni lejuar të jeni viktimë e një diversion tjetër të Vuçiçit në të ardhmen e Kosovës”, ka shkruar në reagimin e tij Visar Berisha.
