Ministri i Punëve të Brendshme, Xhelal Sveçla, ka bërë të ditur se Kosova ka nënshkruar marrëveshjen me EUROPOL-in, përmes së cilës i mundësohet caktimi i Zyrtarit Ndërlidhës formal në këtë organizatë.
Përmes një postimi në Facebook, Sveçla tha që me këtë krijohet linjë e sigurtë e komunikimit dhe shkëmbimit të informacionit me EUROPOL-in.
“Bashkëpunimi ndërkombëtar është tejet i rëndësishëm në përpjekjet tona për luftimin e krimit dhe korrupsionit. Sot, finalizuam nënshkrimin e marrëveshjeve me EUROPOL, me Drejtoreshën Ekzekutive Znj. Catherine De Bolle, përmes së cilave Kosovës i mundësohet caktimi i Zyrtarit Ndërlidhës formal në EUROPOL dhe krijohet linjë e sigurtë e komunikimit dhe shkëmbimit të informacionit me EUROPOL-in”.
“Këto marrëveshje, do të mundësojnë bashkëpunim dhe shkëmbim të drejtpërdrejtë e të sigurtë të informacioneve, ndërmjet Republikës së Kosovës, EUROPOL-it dhe Shteteve Anëtare të Unionit Evropian”.
Tutje Sveçla tha që këto marrëveshje të nënshkruara janë dëshmi e avancimit të mëtutjeshëm të bashkëpunimit në mes të Policisë së Kosovës dhe EUROPOL-it.
“Angazhimi ynë i përbashkët në shtimin e marrëveshjeve bilaterale dhe multilaterale për bashkëpunim policor ndërkombëtar, do të vazhdoj me dinamikë të lartë”, tha tutje ai.
