Kryetari i Komunës së Vushtrrisë, Xhafer Tahiri, ka përuruar sot fabrikën e tekstilit në fshatin Stanoc i Epërm, në të cilën do të punësohen 60 gra të këtij lokaliteti.
Ndërtimi i kësaj fabrike është bërë në bashkëpunim në mes Komunës së Vushtrrisë dhe firmës “VITEX” ku është nënshkruar marrëveshja për dhënie në shfrytëzim objektit të vjetër të ish-shkollës “Migjeni”, me qëllim të punësimit të grave në këtë lokalitet.
Me rastin e përurimit të kësaj fabrike, Tahiri tha se është i lumtur që po u ofrojnë grave një mundësi për punësim.
Tahiri: Një mundësi e jashtëzakonshme për të ulur papunësinë
"Sonte është një lajm tepër i mirë për Stanocin e Epërm, dua të falënderoj kompaninë "VITEX" të cilët i kanë qëndruar marrëveshjes me komunën e Vushtrrisë dhe e kanë rinovuar tërësisht ish-objektin e shkollës, i cili siç po e shohim të gjithë është shndërruar në një vend ku do të punësohen deri në 60 gra. Më vjen shumë mirë që ky angazhim i përbashkët i yni në interes të punësimit të grave po realizohet dhe u realizuan në këtë formë kaq të bukur. Unë dua të uroj të gjithë banorët e Stanocit të Epërm, dua të uroj të gjitha ato gra që do të punojnë këtu, sepse është një mundësi e jashtëzakonshme për të ulur papunësinë e lartë që e kemi te gratë", tha Tahiri.
I pari i Vushtrrisë ka folur edhe protestat që ishin organizuar për të kundërshtuar ndërtimin e kësaj fabrike, e të cilët tha se duhet të kërkojnë falje para banorëve të këtij fshati.
Tahiri: Skeptikët u bindën se investimi ishte i drejtë
"Më vjen shumë mirë që sot janë banorët e Stanocit këtu dhe po e mirëpresin këtë investim kaq të rëndësishëm dhe po ashtu më vjen mirë që të gjithë skeptikët u bindën që ky investim është i drejtë, i duhuri dhe i domosdoshmi. Besoj shumë sonte ata që e kundërshtuan për qëllime personale e individuale do të duhej të dalin dhe të kërkojnë falje para banorëve të Stanocit të Epërm për shkak se krejt Kosova pa protestat e paarsyeshme të tyre. Vërtet, sot është një mrekulli çfarë ka ndodhur në ish-objektin e shkollës në këtë punëtori ku do të kemi punësim, zhvillim e mbi të gjitha do t'iu japim shansin grave të këtij rajoni që të punojnë e me paratë e tyre të shkollojnë fëmijët e tyre", u shpreh ai.
Tahiri tha se si komunë do të vazhdojnë të jenë pas secilin që krijon vende të reja të punës.
Menaxheri i fabrikës “VITEX”, Xhelal Ismajli, ka falënderuar Komunën e Vushtrrisë për mbështetjen që i ka dhënë, derisa tregoi se çka do të prodhohet në këtë fabrikë.
Ismajli: Planifikojmë që t'i punësojmë rreth 60 gra
"Planifikojmë që t'i punësojmë rreth 60 gra vitin e parë, këtu do të kemi edhe me porosi, por edhe prodhime të firmës, të cilat ne i bëjmë të gatshme. Lusim ato gra që dinë të punojnë edhe që nuk dinë do të trajnohen, do t'i aftësojmë ", tha ai.
