Zgjedhjet e 17 tetorit ofruan garë tejet interesante mes kandidatëve për kryetarë të komunave.
Të dielën e kaluar prej orës 07:00 të mëngjesit kur u hapen qendrat e votimit e deri në ora 19:00 kur ato u mbyllën, qytetarët anëkënd Kosovës patën rastin të zgjedhin midis kandidatëve në komunat e tyre.
Sipas të dhënave të publikuara të Komisionit Qendror të Zgjedhjeve, në zgjedhjet e së dielës nuk votuan më shumë se 42.50 përqind e qytetarëve apo 799 e 958 persona.
KQZ po ashtu ka publikuar rezultatet e raundit të parë të zgjedhjeve për kryetar të komuave.
Në vazhdim ju sjellim pesë kandidatët për kryetarë të komunave që kanë marrë më së shumti vota.
1. Arben Vitia, kandidat i Lëvizjes Vetëvendosje për kryetar të Prishtinës.
Vitia ka marrë 35 mijë e 443 vota, po që s’ishin të mjaftueshme për të kaluar pa balotazh. Ai në raundin e dytë do të përballet me kandidatin e Lidhjes Demokratike të Kosovës Përparim Rama.
2. Agim Aliu, Kandidat i Partisë Demokratike të Kosovës për kryetar të Ferizajt.
Aliu e përfundoi çështjen e fituesit qysh në raundin e parë duke marrë 62.53 përqind apo 30 mijë e 441 vota.
3.Në vendin e tretë është kandidati i Lidhjes Demokratike të Kosovës për kryetar të Prishtinës Përparim Rama.
Rama i mori 24 mijë e 572 vota apo 29.35 përqind dhe kundërkandidat në raundin e dytë do ta ketë kandidatin e Lëvizjes Vetëvendosje Arben Vitia.
4.Mytaher Haskuka, kandidat i Lëvizjes Vetëvendosje për kryetar të Prizrenit i ka marrë gjithsejt 23 mijë e 504 vota apo 40.43 përqind.
Ai në raundin e dytë do të përballet me kandidatin e Partisë Demokratike të Kosovës Shaqir Totaj.
5. Gazmend Muhaxheri, i cili e kreu punën pa ballotazh.
Muhaxheri, i cili kandidoi nga Lidhja Demokratike e Kosovës i fitoi gjithsejt 22 mijë e 778 vota apo 60.41 përqind duke mbetur edhe për katër vjet në krye të Pejës.
